Encuanto nos ordenamento legal pa brinda proteccion na e consumido, sr. Luciano Maduro di Dienst Huur & Consumentenzaken ta haya cu a pesar di actualisacion di nos codigo civil, ainda falta instrumento legal pa reforsa e derecho di e consumido.
Recientemente e departamento aki tabatin un reunion cu e miembronan di e ordo di abogado pa busca e manera di minimalisa e frustracion di e consumido ora cu kier defende nan derecho.
Sr. Maduro a declara na Bon Dia Aruba cu nos ley ta brinda suficiente proteccion na e consumido, pero “e proteccion por ta mas”. E no ta haya cu e consumido ta mal para legalmente aworaki, pero ta importante pa reforsa mas e derecho di e consumido.
El a indica cu si nos ta compara nos leynan di Codigo Civil cu esun di Hulanda, nos falta algun ley cu lo por hisa e proteccion, pero esey lo bin cu tempo.
Pero los di nos Codigo Civil, e ta considera relevante un Ley di Comision di Consumido. Sr. Maduro a laga sa cu e ley ey ta hopi importante pa yuda e consumido yega na su derecho.
Analisando e situacion actual di e consumido local, e ta mira cu su caminda ta reclama cerca e negoshi. Pero si e negoshi no kier atende su keho e tin cu bay corte. Den caso cu e negoshi no ta reacciona y e consumido tin cu bay Corte, e ta un proceso largo y comprendibel.
Pero di otro banda e consumido ta haya su mes cu gastonan di abogado, gastonan di corte, y e no tin finalmente garantia di exito. “E ta un paso hopi dificil pa e consumido”, asina el a declara.
Comision di Consumido
P’esey sr. Maduro ta considera importante pa bin cu un Comision di Consumido na Aruba, ya cu e por yuda haci e proceso di reclamo mas chikito. E por trece mas cerca di e consumido via Dienst Huur & Consumentenzaken, caminda e consumido por entrega su keho den e departamento aki y despues di algun siman su caso ta wordo atendi, y e por haya un conseho.
P’esey e departamento menciona ta bogando hopi tempo caba pa e concepto di ley aki cu lo duna bida na e Comision di Consumido bin cla. E ta haya cu e instancia aki berdaderamente ta falta na Aruba pa asina garantisa un proteccion di e derechonan cu e consumido tin.
Encuanto kico lo por ta e bottleneck cu a impedi cu ainda e consumido no a wordo beneficia cu un Comision di Consumido, sr. Maduro ta considera cu eventualmente tin mas ley cu tin prioridad pa wordo pasa. Tambe e departamento Huridico tin capacidad limita. “Den corto e tin di haber cu burocracia cu ta haci cu e ta canando slow”, el a indica.
Unabes cu e ley di Comision di Consumido keda cla, e instancia aki mester cay bou departamento cu ta atende cu asunto di consumido cu ta un departamento cu ta resorta cerca ministerio di Economia.
