Temporada di horcan ta cuminsa dia 1 di juni y ta caba dia 30 di november. E prome parti di e temporada no ta hopi activo, pero cualkier pais y comunidad mester ta prepara pa situacion di yobidanan y eventonan inespera cu por sosode di parti di naturalesa.

Durante un entrevista cu Bon Dia Aruba a tene cu Rino Hermans, hefe di departamento di Bureau Rampenbestrijding Aruba, el a splica cu desde 2017 e organisacionnan di maneho di desaster a dicidi cu nan ta bay purba prepara y train e hendenan pa temporada di horcan na augustus, cu ta e temporada mas halto.

Hermans a bisa cu na aña aki lo tin training hunto cu tur e departamentonan cu ta duna asistencia na luna di augustus, y e ora ey nan ta keda prepara pa e temporada y cualkier eventualidad cu lo por pasa cerca di Aruba.

Tocante e comunidad, el a informa cu nan ta mantene departamento di mitigacion di Bureau Rampenbestrijding, cu ta encarga di saca e boletinnan, actualisa riba su pagina di Facebook y asina tambe nan ta comunica cu prensa pa promove kico lo por pasa y ki sorto di asistencia comunidad por ricibi di Gobierno di Aruba y su departamentonan.

Di mesun manera, Hermans a expresa cu nan ta haci bishita na scolnan pa prepara e muchanan cu e plan cu Bureau Rampenbestrijding a cuminsa desde 2013, den cual ta percura pa aña 2030, e prome muchanan cu a ricibi e presentacion na Aruba lo bay ta adulto y cabes di famia, y for di eynan lo por wak e cambio di mentalidad pa cuminsa prepara comunidad pa nivel di desaster.

Tambe el a comenta cu ta publica e informacion di alerta pa biento duro y lama bruto, y conhuntamente cu Meteo Aruba ta haciendo uzo di tecnologia y e relacion cu tin cu prensa pa publica e mensahenan cu mas frecuencia pa informa pueblo miho.

Hermans a recorda cu tres siman pasa, un persona a hoga na area di Punta Bravo, y den e caso aki ta presenta dos factor: cu e hendenan no ta pone interes tocante e alerta cu ta publica, of nan mes no ta consciente di e risico di landa cu lama bruto. Despues di ricibi informacion cu e victima tabata un turista, pa e motibo aki Hermans a expresa cu ta existi un porcentahe di cada 20.000 hende cu casi sigur ta haci uzo di e beachnan, kendenan no ta Arubiano precisamente.

Mirando esaki, nan a cuminsa traha riba e maneho con nan como departamento por acerca e turistanan. El a señala cu lo cuminsa cu e metodo di antes, cu ta coloca un bandera cora na e beachnan, pero esey mester bin cu un maneho di stakeholders cu ta den tempo extremo pa duna nan comentario y asina por adapta e metodo basa ariba e maneho di desaster di Aruba.

Despues cu nan lo bay purba con lo bay ehecuta e metodo cu material, na unda ta e luganan mas ideal pa pone un palo di bandera y ken ta e persona responsabel pa pone, kita y cambia e color di e bandera cu poco a poco mester introduci pa e hende sa kico ta nifica e colonan.

Hermans a sigura cu e deseo di Bureau Rampenbestrijding ta pa nan keda cla cu e jornada dos siman prome cu scol habri na augustus, mesun periodo cu lo tin aumento di horcan y lama ta bira mas bruto; despues di esey lo dedica mas na e mal tempo y e parti preventivo.

Di loke ta trata informacion pa e turistanan, den dianan aki tabatin lama bruto den e area unda tur e companianan di tour ta bay bishita e Natural Pool, un luga cu manera el a expresa ‘ta hopi bida nos a perde na e luga ey’, y Bureau Rampenbestrijding tin cu zorg pa no sigui perde bida di turistanan.

Pa finalisa, Hermans a pidi di henter comunidad e cooperacion durante e 36 ora cu lo bay train e Plan Nacional di Horcan riba henter e isla, un evento cu por tin un influencia pa e fluho di trafico riba caminda. Aña pasa nan a haya cu e logistica di e pais ta debil, y nan a prepara varios curso pa certifica mas hende cu ta posibel den cada departamento pa Radio Amateur.