ORANJESTAD – Ayera durante un conferencia di prensa di Bureau Rampenbestrijding Aruba, a ser conoci e proyecto Raven, cu ta trata di digitalisacion di crisis cu tur e instancianan lo bay traha na ora di desaster. Prome minister presidente Evelyn Wever-Croes tabata presente, hunto cu dos instructor Mericano di San Diego, California y miembronan di e departamento.

Sr. Robert Toups, ken ta representa e tecnologia Raven cu origen na San Diego, California a expresa su gradicimento y sosten pa sr. Rino Hermans, ken ta hefe di departamento, y su team di Rampenbestrijding pa introduci e tecnologia na isla, y por yuda nan cu maneho di crisis den tempo di emergencia. Tambe el a splica cu Aruba ta e prome pais den e region cu lo bay tin e proyecto aki, y proximamente lo introduci na Australia. California tambe ta usa e tecnologia aki.

Wever-Croes a manifesta cu ora cu un gobierno ta pone e ser humano central, e mester tene cuenta e ser humano den bon tempo, mal tempo y temponan di riesgo, minimalisa e riesgo, y den caso aki, Bureau Rampenbestrijding tin un tempo caba cu ta buscando un forma con nan por maneha e crisisnan mas efectivamente. E bureau aki ta conoci como instituto cu ta haci training pa asina Aruba y tur hende ta bon prepara pa cualkier calamidad.

Asina mes, el a expresa cu mirando cu e mundo ta cambiando y plan di e-goverments cu nan tin den gobierno, Bureau Rampenbestrijding a busca un sistema con por digitalisa e proceso di maneha un crisis. Den e caso aki, nan a yega na e tecnologia di Raven, un forma di atende un crisis di manera digitalisa. Dianan pasa nan a ofrece training pa expertonan, pa asina e pais por ta miho prepara pa cualkier calamidad.

Tambe prome minister a comenta cu esaki no ta un ehempel di e-goverment, pero ta parti di ‘E Crisis Management’, cual di manera digital y mas eficiente den futuro por maneha crisisnan cu por bin di cualkier circunstancia, caminda cu expertonan y profesional no ta tur ora cu mester reuni pa deliberam pero e plannan y pasonan cu mester tuma por wordo vigila y monitor di forma digital, asina por reacciona mas lihe y mas efectivamente.

Di su parti, Hermans a sigura cu e programa aki ta un software cu por yuda pa analisa, mitiga y maneha e crisis riba tur tres nivel. E ta duna un confirmacion pa cualkier gobierno, nan ta haci un actualisacion y tur hende ta haya un mapa di con e situacion ta, tur dia na tur ora.

Ademas di esey, Hermans a splica cu e siguiente paso ta cu nan mester di un satelite box pa por conecta riba internet, y asina nan tin e full mundo pa asisti den e caso cu un situacion manera St Martin mester pasa. Hermans a comenta cu nan por laga Hulanda, of tur pais, pa wak hunto cu nan kico ta e asistencia cu mester, y si por domina e crisis of nan ta perde for di man, y pa via di esey nan por cuminsa prepara material pa Aruba.

Sr. Rene Ridderstaat, cu ta forma parti di seccion Prevencion y Mitigacion di Bureau Rampenbestrijding, a bisa cu e programa Raven tambe lo sirbi pa e medionan di prensa. Prensa lo por sigui y wak kico ta pasando segun loke ta sosodiendo den e tempo ey cu departamento di polis, bombero of otro.

Di otro banda, Ridderstaat a bisa cu nan mester reuni bek pa papia, por ehempel, di e caso si na Aruba ta sosode algun sorto di calamidad, y e sistema di coriente a bay hunto cu Internet. El a expresa cu Aruba mester busca minimo dos di e sistema di satelite pa por activa di biaha e sistema di internet pa un grupo di persona cu mester sigui cu e informacion.

Asina mes, el a splica cu structura di mando ta depende di kico di emergencia e pais lo por haya. Nan tin grupo prepara cu personal di polis, bombero, salubridad publico y departamento social, ora cu ta un caso cu tin scala mas halto ta bin e ‘team operacional’ caminda cu nan ta usa diferente clusternan, entre nan ta polis, medico, departamento social, DOW cu sosten logistico, aeropuerto hunto cu waf, utilidad cu ta e parti di servicio por ehempel Elmar, Web, entre otro y e area turistico como parti ultimo.

Si den e caso cu e clusternan no por haci nada y tin un caso mas grave, Riderstaat a manifesta cu e caso lo wordo manda pa Beleidsteam, cu ta involucra e prome minister pa tuma e decision mas precisa.

Pa finalisa, por ehempel si ta existi un caso cu mester cera tur caminda via hospital pa motibo cu un avion a cay na aeropuerto y mester hiba e persona herida of fayecido, Riderstaat a splica cu den e caso ey, departamento di polis hunto cu DOW ta e departamento encarga pa pone cierto baricada na caminda cu mester ta cera, y nan ta pidi pa prensa na e momento ey pa duna informacion pa e poblacion di no haci uso di e caminda ey.