Diaranson ultimo a tuma luga un conferencia di prensa pa anuncia e cambionan di nomber, logo y website di loke antes tabata Bureau Rampenbestrijding (RBA) y awor a bira Crisis Management Office Aruba (CMO) esaki tin e obhetivo di ofrece un nivel mas halto di siguridad publico pa henter comunidad.
Rino Hermans a sigura cu e cambio ta pa motibo cu e nomber anterior tabata indica kico tabata su tarea ora un calamidad presenta cu e bureau tin cu atende y prepara pa un desaster, na 2014 Nacionnan Uni a proclama cu mester cambia e maneho di desaster pa maneho di riesgo “mi ta kere cu mayoria di paisnan na mundo no tabata cla pa haci e cambio ey, mientras tanto nos a dedica na haci tur e cambionan, structura full y prepara tur e plannan digital pero 2020 tabata un di e añanan cu a pone un break riba e desaroyo cu Aruba tabata bayendo di un cambio di desaster pa un cambio di risico,” el a bisa.
Tambe el a splica cu un di e prome pasonan ta cu ora hendenan na Aruba ta construi casnan den rooi y ora awa yobe, nan ta yam’e cu “e cas a flood” pa loke Hermans a sigura cu aworaki nan ta den un etapa transitorio pero esaki den futuro no lo por tuma luga, como por ehemplo, si tin un concierto cu 10.000 hende y no tin un plan di siguridad, loke ta nifica cu e structura aki ta bay duna na e pueblo di Aruba segun el a menciona, un garantia cu no ta bay tin actividadnan segun nan clasificacion, si tin un plan di siguridad en caso cu algo lo sosode.
Manera ta conoci, nan ta bezig cu Early Warning cu hunto cu e website y cu tur e otro partners den risico otro aña ta bay cuminsa haya noticianan mas adelanta y e otro parti ta cu nan ta cambiando e maneho di cu Gobierno di Aruba ta carga tur e responsabilidad y e pueblo no, aworaki nan ta haciendo un plan di siguridad y hopi scolnan ta hayando esun di nan na unda nan ta calcula cu di 2025 pa 2030 Aruba por ta un di e paisnan mas desaroya den un pais completamente resiliente manera Hermans a sigura.
Carnaval 70 de porta, pa esaki Hermans a bisa cu nan ta den dialogo cu Cuerpo Policial, na unda mester bin un plan di siguridad pa eventonan publico di e magnitud aki na unda pueblo ta bay cuminsa ripara cu den futuro no por organisa un evento mas na Aruba sin un plan di siguridad aproba “cu na final e ta pa scapa bida di hende ora un incidente lo sosode, nos mester por ta capaz pa deal cune y deal cu e consecuencianan tambe pero si bo ta prepara, bo sa precies con pa atende cu esey.”
Debi cu leynan ta un poco anticua y awor e departamento ta yama CMO y tin su leynan, tin proposicion riba mesa pa trece e cambionan den departamento unda Hermans a bisa cu nan a revisa esey y aworaki nan ta actualisando e website pa Early Warning por custuma cune pero nan tabatin e sugerencianan di regulacion cu mester cambia.
E calamiteitverordening mes ta di 1996 y e ta mas dedica pa desaster natural y no pa risico ni pa cambio climatico, den esaki e sugerencianan tin cu cana su caminda y nan tin capacidad di huristanan pa traha ley cu ta bay tuma su tempo manera Hermans a bisa, pero nan por cambia un maneho semper den Conseho di Ministernan pa siguridad di full un comunidad y siguridad di Estado.
Hermans tambe ta considera cu Aruba ta e unico isla den region y na mundo cu tin su mesun logistica, mantenemento, parti digital caminda nan a centralisa tur e reunion, maneho y logistica pa duna pueblo e sosten durante e momentonan dificil.
Di su parti, prome minister Evelyn Wever-Croes ken tabata presente den conferencia di prensa aki a sigura cu esaki ta un paso hopi importante cu nan a haci pa Aruba por avansa y prepara su mes pa cualkier calamidad unda el a bisa cu nan a atende tur e retonan cu a presenta “pero nos ta sinti cu nos tin cu stap up pa bay na e siguiente paso, e miho manera y mas facil pa haci’e ta despues di calamidad pa bo ta bon prepara.”
Prome minister a splica cu nan tabata traha enfoca riba desaster y awor ta bay enfoca riba riesgo, ora ta enfoca riba riesgo ta miho prepara ora cu e desaster yega y esey ta e paso mas importante pa nan “mi ta kere cu lo cual cu loke BRA a haci den ultimo añanan a demostra e necesidad cu nos tin pa cu un departamento asina importante, danki Dios Aruba no ta haya horcan ni un tipo di calamidad asina pero semper nos ta cla pa nos mes y prepara pa yuda, aworaki mirando cu cambio climatico y tur otro retonan cu tin nos mester ta miho prepara, mi ta contento cu e paso aki, cu nan a yega asina leu y cu esaki mi ta sinti mas trankil cu nos ta prepara pa un miho eventualidad.”
Riba diferente area, por ehemplo riba cambio climatico, prome minister a informa cu nan tin un comision cu ta trahando riba recomendacionnan cu gobierno mester adapta, CMO tambe a manda diferente sugerencia pa cambio di maneho y caminda cu mester cambio di ley.
“Nos ta keda pendiente den kico nos profesionalnan ta conseha nos y di esey nos ta tuma y traha riba e diferente cambionan, mi tin cu bisa cu nos tin hopi ley pa cambia, tin un trabou enorme pa haci eynan cu poco hende manera experto den tereno di cambio di ley, pero e peticionnan ta bin di departamento di CMO den e caso aki unda nos lo procede pa aproba e cambio y despues laga nan finalisa e cambionan mes den ley,” prome minister a menciona.
Pa prome minister awor CMO ta bay demostra di ta eynan cu informacion al dia y na ultimo momento unda tin un punto central y cu calma y cu sano huicio “nos tin cu prepara nos mes mas miho y mi ta kere asina CMO ta bay gana e confiansa y respet tambe,” el a finalisa.
