Ta con nan ta traha anto?

Segun un articulo den nos propio corant di ayera, Bureau Leerplicht, cu ta responsabel pa e supervision riba cumplimento cu e ley di leerplicht (di december 2011), segun nan propio informacion, no tin un database, y ta buscando aparentemente awor un colaboracion cu Censo pa yega na informacion tocante e muchanan den e edad unda nan ta obligatoriamente participa na enseñansa. Esey ta mucha entre edad di 4 y 17 aña, es decir ora nan cumpli 17 e obligacion no t’ey mas.

E pregunta cu ta bin dilanti mesora: con por ta cu un tarea gubernamental, cu ta existi di fin di 2011, ban bisa inicio di 2012, o pa mas tarda entrante aña escolar 2012 – 2013, ainda no tin instrumento basico pa por funciona? Esaki ta un di tantisimo tareanan cu a keda sin cumpli pasobra e gabinete berde tabatin otro cos di haci cu placa? No ta dificil pa nos kere esey, pero tin mas aspecto pa tuma na cuenta.

Ta bisa awor cu ta busca colaboracion di Censo pa por tin cierto informacion basico di e muchanan di e edad concerni, pero esey den e caso aki no ta e prioridad. Prioridad mester ta cu tur scol cu ta haya subsidio di gobierno, mester duna tur informacion tocante tur alumno cu nan tin, y no solamente na cuminsamento di aña escolar, sino cada tres luna manera ta nan obligacion. Pregunta: e scolnan ta cumpli cabalmente cu e obligacion aki? Y si nan ta cumpli cu esaki, anto e siguiente pregunta ta na esunnan responsabel pa ehecuta e supervision, si ta pone e informacion aki disponibel na Bureau Leerplicht? Y con nan ta entrega esaki, riba papel o digital? Loke ta haci e pregunta surgi si ta den estilo di picapiedra nan ta comunica cu e scolnan y ta con nan ta haci pa mantene un bista riba e casonan problematico mes. E punto ta cu un database tampoco lo yuda si e trabao mes no ta bon organisa. Tabatin un tempo cu computer no tabata existi y tabatin paisnan cu un administracion publico aceptabel, y otronan cu no sa organisa.

E asunto ta trece tambe dilanti e caso di e muchanan ilegal, cu pa tratado y pa ley, mester haya enseñansa, tanten cu nan y nan mayor(nan) ta permanece riba nos isla. Nan sigur no ta den e database di Censo pasobra nan no por ta registra. E informacion ey necesariamente mester bin di e scolnan, pues atrobe nos ta yega na e punto cu ta e scolnan tin e deber di notifica e autoridad varios biaha pa aña riba e total di alumno cu nan tin, simplemente pasobra esaki ta e base pa nan haya subsidio. Den e articulo ta referi tambe na e entrevista cu hefe di Censo cu ta observa, completamente corecto, cu no por exigi di un mucha, o di su mayornan, un prueba di inscripcion na registro civil, pasobra e ley y e tratado ta bisa cu e mucha mester haya enseñansa, irespecto su situacion encuanto residencia. Pues ta e scol mester acepta un mucha ilegal, duna e alumno un cupo, y seguidamente notifica autoridadnan hudicial di e presencia di un mucha sin residencia legal, loke ta un asunto cu e autoridadnan aki mester atende. Nos ta puntra nos mes si di berdad tur scol ta cumpli sagradamente cu ley den esaki. Naturalmente e scolnan no publico tin un modo di scapa di e problema, alegando cu e alumno (ilegal) no ta di e creencia riba cual e scol ta basa, pero e scolnan publico mester cumpli sigur. Cu consecuencia cu lo no ta straño pa mira un proporcion mas grandi di alumno ilegal na e scolnan publico, cu lo mester deal cu e situacion di tur manera.

Henter e asunto ta crea duda di con e Bureau Leerplicht ta funciona te awor, mas di cinco aña den e proceso. Por ehemplo: tin instruccion practico pa cada scol, basa riba e ley, kico ta spera di nan den caso di ausencia di alumno? Por ehemplo, ta existi un criterio pa notifica ausencia, ban bisa cu si un mucha ta ausente pa mas cu tanto dia, Bureau Leerplicht mester haya notificacion inmediatamente? Y kico ta sucede despues? E bureau mes ta bisa cu nan no tin un registro. E hefe tin un schrift grandi anto den cual ta nota tur e notificacionnan? O tin un funcionario cu ta hinca tur melding den un spreadsheet? Y ta con e follow up ta tuma luga despues? Ta pasa desk pa desk parti e casonan? Y ken ta controla despues kico a sucede, of no?

Nos mester comprende bon cu e asunto di scol obligatorio no ta un obligacion pa e mucha, legal of no, cumpli cu esaki. E ta un ley pa percura cu e mayornan, e scolnan y e instancianan di supervision cumpli cu e mucha, cu tin derecho riba enseñansa. Ora ta diseña un modelo di control y supervision, ta primordial pa tene esey na bista. Nos tin e impresion cu e coordinacion entre e principal responsabelnan pa e supervision, e scolnan y e Bureau, no ta cana bon. Aki lo mester cuminsa drecha, cu of sin database.