Tambe pa por tin link cu Censo
Bureau Leerplicht no tin un database/registro pa asina por tin un miho bista riba e muchanan cu ta leerplichtig entre 4-16 aña. Cu un registro adecua, por bin un stufstekker cu Censo por ofrece nan informacion di e muchanan aki. Algo cu aparentemente Bureau Leerplicht tin algun tempo ta spera riba dje.
Siman pasa nos a publica tocante un encuentro cu Bureau Leerplicht tabata tin cu cabesantenan di scolnan primario riba diferente punto di preocupacion. Un di nan tabata si Bureau Leerplicht tin bista riba e muchanan entre 4-16 aña en general. Bureau Leerplicht ta pensa cu un link cu Censo lo por yuda nan wak precisamente unda e muchanan entre 4-16 aña ta, ki scol nan ta bay y otro datonan. Pero pa esaki funciona, Bureau Leerplicht mester tin un database/registro di nan mes, cual actualmente nan no tin.
Esaki ta un parti tecnico cu gobierno (minister di Husticia y Asuntonan General) lo mester regla hunto cu e directivanan di entre otro departamento di Enseñansa. Bureau Leerplicht ta informa nos cu tur esaki a wordo treci dilanti cerca e gobierno anterior, pero e proceso nunca a sigui pa algun motibo of otro. Aworaki Bureau Leerplicht entre otro ta bolbe manda e informacion/puntonan na e gobierno cu a caba di sinta cu speransa cu pronto lo cuminsa ‘laga e bala lora’ pa soluciona cierto cosnan.
Muchanan ilegal tambe ta Leerplichtig
Censo ta informa nos cu no ta muchanan cu ta inscribi so ta obliga pa bay scol. Muchanan cu ta biba akinan pero nunca a inscribi tambe mester sigui les. Como tambe muchanan ilegal, segun hefe di Censo, Sharin Luydens. Simplemente un link cu Censo no lo yuda si Bureau Leerplicht no tin un database. “Bo tin cu cuminsa na mira ki software tin riba mercado. Con Bureau Leerplicht ta haciendo na Hulanda y si e software ta link na Censo di Hulanda, con esaki ta wordo haci anto kico ta e mensahenan cu e ta manda y vice versa? Pasobra tambe tin terugmeldingsplicht por ehempel”, sra. Luydens ta splica. Censo na Hulanda ta brinda cliente cu datonan cu nan mester pa haci nan trabao. Pero e clientenan aki tambe ta meld na Censo y bisa por ehempel si bo tin tal mucha skirbi un caminda y nan ta haya informacion for di e mayor riba un cambio. Por ehempel Dimas na Aruba por wak den e sistema di Censo, pues ora un hende bin pidi inzage, nan ta subi un site y mira si ta inscribi of no, of si bo ta biba na unda of no. Pero un sistema asina no por funciona por ehempel pa Bureau Leerplicht.
Sra. Luydens: “Bo mester un database caminda cu por ehempel bo ta bisa Censo pa yuda bo cu esunnan di 4-16 aña, nos ta saca esaki y bo ta cuminsa na hinca esey den bo database. Bo ta haci un data match cu otro scolnan wak si e informacion cu nan tin ta klop.” Pero bo ta bay haya algun diferencia unda cu cierto mucha no ta inscribi pasobra nan ta ilegal. “Mi no a tende Bureau Leerplicht papia tambe over si nan ta exigi muchanan papel di cinco florin si no nan no ta laga nan inscribi. E cos ey ta prohibi pa ley”, sra. Luydens ta bisa. Si bo no trece papel di cinco florin of bo ta ilegal nan no ta tuma bo na scol, mientras cu den ley (Artikel 7, AB 1993 no. GT 33) ta para cu ta prohibi di puntra of obliga e mayornan di trece un papel di cinco florin, of trece permiso di e mucha pa inscribi nan. Pero algun mayor toch ta wordo pa haci esey anto no tin control. Bon Dia lo sigui riba e tema cu entre otro departamento y ministerio di enseñansa.
