Diahuebs 12 di October, Prome Minister Evelyn Wever-Croes a haci un bishita na Bureau Interne Diensten (BID) en conexion cu 70 aña di BID. BID ta un departamento di Gobierno hopi crucial cu ta registra documentacionnan di Gobierno y tambe ta encarga cu ‘Centraal Magazijn’, e luga na unda cu departamentonan di Gobierno ta busca tur nan productonan cu nan tin mester.
BID, na e ocasion aki tambe a lansa nan logo y website nobo cu ta tipifica e era nobo di BID pa e siguiente añanan nos dilanti. Prome Minister a ricibi un presentacion hopi labora di e facilidad di uzo di e Website y e beneficionan cu esaki ta brinda na nos pueblo.
“Cu e cambionan aki den e departamento, cu Website nobo, e servicio na comunidad ta bira mas accesibel na unda e ciudadano por sa, entre otro, na unda y den ki fase su documentonan y peticionnan ta. Esaki ta e era nobo cu Gobierno kier bay aden, cu mas transparencia, confortabilidad y miho servicio”, Prome Minister a expresa.
Prome Minister ta felicita cada trahado cu a yega y cu ta trahando na BID cu durante 70 aña a traha pa hiba e departamento padilanti y pa sirbi pais Aruba. Pabien na Bureau Interne Diensten (BID) cu e celebracionnan aki. Sigui cu e bon trabao.
