Den un esfuerso conhunto pa mehora e area di Village na San Nicolas, Bureau City Inspector (BCI) y Serlimar a uni forsa pa un accion di limpiesa cu a cuminsa dialuna ultimo.
E iniciativa colaborativo aki tin como meta pa aborda e problemanan di acumulacion di desperdicio den e bario y promove practicanan di maneho di desperdicio responsabel entre e residente y negoshante nan.
E area di Village tin importancia historico y cultural pa Aruba, cu un pasado vibrante cu siguramente a contribui na e identidad unico di nos isla. Sinembargo, den e mundo di social media cu nos ta bibando aden, departamentonan di naturalesa ya for di basta aña a cuminsa ricibi imagen y video cu ta indica e ciudadano su comportacion pa loke ta trata e desperdicio cu nan ta produci. Tambe a bin dilanti e necesidad pa mantencion di e area di Village. Tanto dato di pasado y presente ta indica un tendencia preocupante di acumulacion di desperdicio, causando retonan ambiental den e area y tambe un bista no agradabel pa e habitantenan cu si ta responsabilisa nan mes pa nan desperdicio y tambe pa Aruba su bishitantenan.
“Un yamada ta bay na habitantenan di Village y tambe negoshantenan di San Nicolas pa tuma medidanan proactivo pa sigura cu e bario keda limpi,” Minister Arends ta remarca. “Ta esencial pa tur residente di Aruba tin un bari di sushi pa nan desperdicio di cas, tambe tur negoshante mester tin instalacion di bari grandi suficiente pa e desperdicio cu ta produci riba nan tereno.”
E colaboracion entre BCI y Serlimar hunto cu otro departamentonan di Gobierno ta subraya e responsabilidad comparti pa mantene Aruba limpi. Mientras Gobierno ta asumi su responsabilidad den educa, informa y brinda espacio den e fase transitorio di maneho di desperdicio, cooperacion comunitario ta esencial pa promove cu reglanan ta wordo obedece. Cayanan di Village no ta bo bari di sushi. Cualkier situacion di deposito di desperdicio inadecua, raporta esaki via FIXI.aw, sigurando accion rapido door di autoridadnan relevante.
Minister Arends ta gradici e ploegnan y departamentonan cu ta traha diariamente pa aborda e problema di desperdicio. E ta keda na cada miembro di comunidad pa duna di nan parti den mantene Aruba limpi y bunita. Cu accion colectivo y un compromiso pa un maneho responsabel di desperdicio, nos por conserva nos naturalesa y herencia cultural cu ta defini nos Aruba dushi tera.
