Bureau City Inspector: ‘Tur hende mantene nan cura limpi pa evita criadero’

Problema di sangura ta keda un situacion cu semper ta keda presente den comunidad. E biaha aki, Bureau City Inspector a duna su punto di bista tocante sushi den cura cu por trece criadero.

Robby Rosel, relacionista publico di Bureau City Inspector, a bisa cu en conexion cu awasero cu tabatin recientemente, por a mira cu tin sangura y musca rond di e isla. Tambe nan ta wak cu tin taira poni den cura of parti pafo di algun cas.

Esey ta trece consecuencia di insecto. Di parti di Bureau City Inspector, nan kier pa comunidad cuminsa mantene e parti pafo di nan cas y cura limpi, pa asina evita cu e situacion por yega mas leu.

“Nos tur conhuntamente por tene e parti di nos cas limpi. Locual ta taira tambe. Tin tire shop cu ta tuma nan, si no ta haci uzo di esaki, hiba nan dump pa asina por deposita manera mester ta. Pa asina por mira un Aruba cu menos sangura posibel”, e ta splica.

Pa locual ta trata sangura, cu por transmiti dengue y otro malesa, ta pidi pa cada ciudadano cu ta biba na Aruba percura pa e parti di limpiesa. Departamento di BCI ta riba caminda y core rond pa controla y duna asistencia si tin mester.

Rosel ta bisa cu ta den area di San Nicolas, nan ta mira cu tin cantidad di sushi manera taira, stoof, frishider, diferente articulo di desperdicio na ‘gran cantidad’, cu ta tira nan y por ta peligroso pa esunnan cu ta biba den Village, San Nicolas.

Tambe conhuntamente cu Serlimar nan por yega na un areglo pa por lanta e cantidad di sushi cu tin. Na area di Paradera tambe a constata e mesun situacion, na Santa Cruz y Madiki tin sushi. Asina BCI ta haciendo control den cada bario.

Departamento por a tuma nota di cantidad musca y sangura cu tin na Aruba. “Laga nos cada un trata esaki, pa asina por tin menos problema cu situacion aki y tin un Aruba sano pa cada un di nos”, el a expresa.

Pa cualkier hende cu tin molester, por yama e departamento, unda team di BCI lo pasa evalua cu nan patruya y wak e situacion y despues comunica cu GKMB, pa asina nan pasa y tambe por actua.

Sinembargo nan ta sigui hala atencion, pero ta pidi pa persona haci limpi den nan cura. Pa persona no tira sushi riba tereno publico, sea pafo of banda di caminda. Ta pidi pa hende cumpli pasobra lo tin momento cu lo cuminsa parti boet tambe. “Na tur esunnan cu ta pensa cu Bureau City Inspector no tin derecho di duna boet, pero actualmente nos ta cuminsa cu inspector cu lo duna boet pa esunnan cu no ta cumpli”, el a menciona.