Ayera Bureau City Inspector (BCI) a informa cu nan a haya varios meld pa realisa limpiesa na algun caminda rond di e isla pa asina sigui atende cu e problema di sushedad, pero esaki no ta den mondi so manera potretnan ta ilustra, sino den pleno centro di San Nicolas tambe.
St. Maartenstraat, Canashito y Catiri tabata na beurt ayera unda BCI a recoge basta sushi cu tabata tira riba caminda publico manera saconan preto den mondi, palonan y otro desperdicio di construccion segun e potretnan ta ilustra.
Bureau City Inspector (BCI) ta e organisacion encarga cu mantencion di limpiesa y den caso aki cu e eliminacion di dumpnan ilegal. Den luna di october 2022 Gobierno di Aruba a lansa e plataforma FIXI, cual ta e plataforma ariba cual ciudadanonan por meld dumpnan ilegal cu tin rond Aruba.
BCI ta ricibi e notificacionnan aki a traves di e plataforma pa asina por tuma e accionnan necesario.
Pero no ta solamente Bureau City Inspector esun cu por atende melding di un usuario, tambe departamentonan como Santa Rosa, Directie Natuur en Milieu (DNM) Fundacion Parke Nacional Aruba of Serlimar tambe por atende cualkier melding cu por drenta riba e plataforma.
Den otro esfuerso pa conscientisa comunidad pa hiba un maneho di desperdicio responsabel y sostenibel, minister di Transporte, Integridad, Naturalesa y Asuntonan di Adulto Mayor, Ursell Arends, a lansa e iniciativa di ‘Baki den Bario’ e cual ta bay tin su proximo edicion dia 29 di juni na Tanki Leendert y 27 di juli na Veld di Undesa na Savaneta unda nan ta purba di stimula habitonan di separacion di desperdicio a base di tipo, grupo, of producto den hogarnan. Baki den Bario no ta habri pa desperdicio comercial, solamente pa residencial specialmente pa e siguiente producto of materialnan: metalnan, e-waste, greenwaste, carton, taira, azeta di cushina, desperdicio di construccion reciclabel y desperdicio mescla.
Pero a pesar di e diferente esfuersonan aki, te ainda ciudadanonan ta sigui reporta dumpnan ilegal na varios caminda. Manera ta e trend aworaki, ciudadanonan ta usa e diferente rednan social pa trece pa dilanti un cantidad di situacionnan pa expresa nan malcontento, nan preocupacion of pa haci denuncia publico.
