ORANJESTAD – Den dianan aki, Bureau City Inspector a haya dos auto nobo cu lo cual nan lo por brinda un miho servicio pa comunidad.
Kevin Peterson, director di Bureau City Inspector, a splica cu e dos auto cu nan tabatin na departamento mester cambia for di juni di aña pasa. Tambe el a duna di conoce cu otro luna, nan lo haya dos auto mas, pa asina nan lo por brinda un miho servicio y trabou pa e comunidad di Aruba.
Peterson a bisa cu nan mester sali hopi riba caya cu tres grupo, y semper tabatin un cu tabata keda pafo pa via cu nan no tabatin suficiente auto pa haci nan trabou.
E trabou di Bureau City Inspector principalmente ta pa nan sali segun e kehonan cu nan ta ricibi, of nan mes ta core riba caya y ta wak cosnan cu no ta bon. Por ehempel, nan a scoge camion tipo 4×4 pa motibo cu hopi biaha, hende ta prefera tira sushi riba caminda cu no ta den bista di pueblo.
Tambe Peterson a bisa cu nan lo bay haya otro dos auto, pa nan tin un total di cuater, nan lo por duna un servicio optimal riba caya, di e mesun manera el a expresa cu nan ta zorg pa tur e barionan.
Peterson a agrega cu e siman aki, nan tabata cu hopi trabou pa via di e paradanan di carnaval, tur e paradanan City Inspector ta traha hunto cu Serlimar pa haci henter e ruta limpi. Peterson a duna un gradicimento pa e pueblo cu a comporta bon durante e paradanan di carnaval cu a tuma luga caba, y tambe nan como City Inspector, ta espera cu e proximo parada lo bay di e mesun manera tambe.
