Bureau City Inspector (BCI) conhuntamente cu Ministerio di Medio Ambiente ayera atardi a anuncia cu nan ta bay ta presente riba caya den dianan aki di carnaval pa asina por ta mas cerca di comunidad enfocando riba maneho di desperdicio.

Robby Rosel PR di Bureau City Inspector den un conferencia di prensa a splica cu ta asina cu pa haya un maneho mas efectivo y responsabel nan a trece dilanti cu nan ta e instancia cu den e diferente parada di carnaval ta bay ta repartiendo saco dos ora prome cu parada lo cuminsa, di e forma aki cada persona cu ta bay ta riba e ruta di e parada por deposita nan desperdicio den e saconan aki y despues Serlimar ta bay piki e saconan.

Igualmente, nan a presenta na medionan di comunicacion presente y comunidad en general e T-shirtnan cu miembronan di e ekipo di BCI ta bay ta bistiendo pa asina ey mustra cu e parti di limpiesa cu nan ta desea pa Aruba henter ta hopi importante.

“Riba e T-shirt nos ta bay ta cargando e logo di BCI y di FIXI, un plataforma cu ta sumamente basico pa por haciel’e cu un potret ora ta desea di haci un reclamo pa loke ta trata desperdicio riba caminda y e ora ey BCI lo dirigi esaki na esnan concerni pa por haci e trabou, y nos tambe ta bay wak si ta un trabou di medio ambiente, sushedad of cualkier otro desperdicio unda nos tin plugnan cu lo bay recoge esaki di biaha,” Rosel a expresa.

Nan a gradici na minister di Medio Ambiente Ursell Arends pa pone esaki disponibel pa e departamento aki pa otronan pa asina nan por sigui mantene Aruba limpi.

Di su parti, minister Arends ken tambe tabata presente den e conferencia aki a señala cu esaki ta forma parti di e maneho responsabel di desperdicio cu nan ta bezig implementando y tambe creando e conscientisacion alabes cu ta hopi importante manera el a menciona, specialmente den e cinco parada di carnaval unda nan tambe ta bay t’ey pa esnan cu ta presencia e parada por haci pone nan desperdicio den un saco di sushi cu BCI ta bay entrega.

“E meta principal ta pa nos mantene nos isla limpi y conhuntamente cu e otro departamento como Serlimar y otronan cu a coopera tambe pa haci esaki posibel,” el a sigura.

Di e aplicacion FIXI, minister Arends a informa cu ora un ciudadano ta tuma nota di desperdicio benta riba caminda publico como den naturalesa cu mester wordo atendi, por reporta esey riba e aplicacion of website di FIXI pa asina ey e plugnan haci e trabou di limpiesa di e zona afecta.

“Ban haci uso di e saconan durante di e paradanan aki y asina aki conhuntamente nos por tin full e ruta despues di e parada pa tur e bishitantenan cu ta bishita nos isla tambe por nota cu nos como ciudadano ta hendenan cu ta responsabel y civico cu ta zorg pa mantene su isla limpi,” el a bisa.

BCI tambe a informa e paradanan unda nan ta bay ta presente dos ora prome pa haci entrega di e saconan, e cual ta diadomingo awor 5 di februari Parada di Mucha di Oranjestad, 11 di februari Lighting Parade, 12 di februari Parada di Mucha na San Nicolas, 18 di februari Parada Grandi di San Nicolas y 19 di februari Parada Grandi di Oranjestad.

Igualmente a señala cu Serlimar ta pone nan barinan di sushi durante cada un di e rutanan di e parada.

Di loke ta trata e paradanan unda diferente famia, companianan of organisacion tin asigna caba un kavel pa por admira y disfruta di e desfile di carnaval, Rosel a sigura cu te ainda DIP tin un regla pa loke ta trata uso di palet cu no ta permiti, pero toch tin hende ta haci uso di dje durante e parada y despues e ta keda como desperdicio.

“Hopi di nos ora cu bo ta usa lago bo no ta gusta bay cunele bek cas, anto tambe ta un mahos bista tanto pa turista y tambe pa nos medio ambiente pa ora palet ta wordo usa, por fabor pueblo di Aruba no usa palet ni carton, tampoco corta e matanan pa por usa e espacio durante e parada pa motibo cu esey ta daña nos medio ambiente,” Rosel a finalisa.

Tocante esaki, na aña 2020 ora ultimo paradanan di carnaval a tuma luga prome cu pandemia di Covid-19 por a recorda cu den e parada di mucha na Noord e mensahe di no usa palet a yega pero cu igualmente nan a haya dos luga cu tabata haci uso di esaki, un di nan tabata trata di un barco cu a ser arma riba caminda di Boegoeroei asina como tambe nan a haya stoelnan di palet.