Bureau City Inspector (BCI), organisacion cu ta traha pa naturalesa y medio ambiente rond di Aruba, a informa comunidad pa loke ta trata actividadnan di limpiesa cu nan ta bin haciendo na e isla den ultimo dianan, pa motibo cu nan ta hayando basta sushedad riba caya.

Bon Dia Aruba a tuma contacto cu Robby Rosel, PR di e departamento aki, y el a splica cu for di lunanan pasa y aworaki cu temporada di Pasco a yega, hende ta haciendo limpiesa den cas, poniendo tur e sushedad ey pafo di cas, riba caya cu ta caminda publico, of tambe ta transporta e sushi y lag’e tira den mondi.

Rosel a sigura cu BCI ta bin haciendo control y nan ta hayando yamadanan di comunidad mes na gran cantidad, caminda cu hendenan ta pidi pa e departamento sali y atende e casonan asina.

Rosel a bisa cu nan a ripara cu na zona residencial den area di Playa, entrada di centro di Oranjestad y diferente otro partinan di Aruba nan a haya basta sushi di hendenan cu ta haci renobacion di cas, cu ta pone santo, bloki, piedra, y diferente material, cu ta lag’e tira na parti pafo di cas y cu e material aki ta keda dianan para, pa lo cual bisiñanan ta yama pa reclama. “Esaki no ta nada bunita, pasobra e sushedad aki ta trece bestianan”, el a sigura.

“Di e yamadanan cu ta drenta pa loke ta trata sushedad di cas, e mayoria ta di Centro di Oranjestad”, Rosel a afirma.

Ademas, el a splica cu aunke Aruba ta den crisis pa via di pandemia Covid-19, tin algun hende cu por tira klapchi y esey hunto cu sushedad tira riba caminda of den mondi, por causa un incidente innecesario.

Rosel a haci un pedido pa comunidad pa mantene e cayanan limpi, cura di cas limpi, tira tur sushi afo sin cu esey lo afecta bisiñanan y si no tin transporte pa esey, por tuma contacto cu compania di retira sushi, por ehemplo, Serlimar of otro compania cu persona ta desea, pa haya un baki y di e manera ey por hacie di forma corecto.

Tambe el a trece dilanti cu ta hopi importante destaca cu algun ciudadano ta lagando nan tapa boca usa benta riba caya. “Tur dia, na tur caminda nos ta haya tapaboca, tanto na camindanan na unda persona ta haci ehercicio como na Centro di Oranjestad tira riba vloer. Esaki no ta aceptabel”. Rosel a expresa. “Esaki ta trece mas peliger pa cada un di nos mes” el a manifesta.

Ademas, el a conta cu e aña aki tabata basta exitoso pa e departamento aki, caminda nan a bolbe haci e trabao di limpiesa di autonan bieu riba caya – ya cu tabatin un gran cantidad di esaki na diferente districto di Aruba – y hunto cu ayudo di Serlimar, nan por a recoge desperdicionan cu ta keda riba caya.

Tambe el a informa cu nan tin plannan grandi pa otro aña 2021. El a menciona cu un di nan ta cu tin basta cas rond di Aruba cu no tin doño of cu su doñonan a muri y a laga e cas bashi. Nan ta trahando riba un plan pa asina nan por wak con nan ta bay haci cu e casnan aki, conhuntamente cu Directie Infrastruur en Planning (DIP) pa por yega na un areglo pa wak si por basha e cas abao, of si e doño di e cas por bend’e pa otro persona, pa asina no laga e cas bandona.

Mirando cu no tin carnaval pa aña 2021, BCI no ta bay ta activo den e parti aki. Pero asina mes el a señala cu ta importante pa comenta riba e hecho cu algun ciudadanonan tin problemanan cu awa di pos, cu ta lagando core esaki riba caminda publico. “Esaki ta algo contra ley, busca un septic tank pa nan haci e pos di cas limpi, cu mester ta bon y cu no mester pasa pa cas di un otro bisiña.”

Rosel a finalisa cu tur siman y tur nan tin diferente personanan riba caya pa controla e situacion aki di awa di pos y limpiesa na Aruba.