Bureau City Inspector a duna 24 ora na doño di cas pa habri caminda pa lama cu ta publico

Manera Bon Dia Aruba a publica diasabra 11 di maart, un situacion a tuma luga na Savaneta di cual un usuario di rednan social a publica un potret, unda por mira cu na un cas cu ta keda dilanti lama, a pone un aviso indicando cu e pida tera su dilanti, esta e lama, ta propiedad priva y cu no por pasa.

Ta importante pa remarca cu na Aruba tur lama ta publico y esaki ta skirbi den ley. E ley tin e nomber ‘Landsverordening openbare wateren en stranden’ (Ordenansa nacional awanan publico y nos playanan).

“Pida beach cu a keda pa e pueblo di Savaneta cu por landa y mayoria bes aki hopi hende di edad ta landa. Y awor pa sorpresa nan ta encontra aviso cu e beach y lama ta propiedad priva. No por,” e usuario a publica hunto cu e potret.

Segun el a menciona den e publicacion, ta trata di un beach cu ta net pariba di ex-Brisas del Mar.

Manera menciona caba na Aruba tin e ley ‘Landsverordening openbare wateren en stranden’ (Ordenansa nacional awanan publico y nos playanan) cu ta stipula cu tur lama na Aruba ta publico. E ley ta dicta: “Den e ordenansa aki y e disposicionnan basa riba dje ta compronde cu awa publico ta awa cu ta accesibel na tur, limita of no, den virtud di normanan di derecho publico.”

E publicacion a ricibi un ola di comentario di parti di comunidad mustrando nan malcontento y frustracion pa e situacion, cu ya caba a cuminsa bira repetitivo na diferente parti di Aruba.

Ayera Bureau City Inspector mediante un comunicado di prensa a informa cu dia 9 di maart a drenta un melding caminda un bisiña di Savaneta a yama pa informa cu tabatin hopi sushi y cu entrada pa lama a ser cera cu mata.

Nan a dirigi un patruya pa e sitio y nan a papia cu e persona encarga di e cas na Savaneta, “inspectornan a splica e persona aki cu e no mag di cera e entrada di lama pasobra esaki ta publico y cu tur lama rond Aruba ta publico cu ni un hende por cera esaki. Mesora a tuma contacto cu e doño di cas y a bisa cu e tin 24 ora pa kita tur desperdicio y habri e caminda bek cu ta pa publico. Ora cu BCI a bay bek controla e lugar a haya esaki  haci limpi y a habri e caminda di e lama. Tambe nos por a mira cu tin algun cas mas cu tambe a cera cu hekwerk pero lo bay acerca pa kita esaki nan pronto.”