No ta un secreto cu for di dia cu dump di Parkietenbos a cera tin hopi sushi rond di e isla na unda cu cada dia mas e problematica aki ta birando mas grandi, sinembargo, Bureau City Inspector (BCI) y e ploegnan di limpiesa ta bezig cu esaki conhuntamente cu DOW.
Ayera atardi Bureau City Inspector a informa cu un melding di SIA a drenta cerca trahado di BCI cu patras di corte den area di Playa tabatin hopi sushi y cu tur e baki matanan tabata yena di desperdicio igualmente di matanan cu a crece bira grandi.
Mesora patruya 95 a presenta na e sitio pa por wak e trabao y tuma accion , e polisnan di e patruya aki a tuma contacto cu DOW pa asina hunto nan tur haci e trabao aki. Ploegnan di BCI , DOW a presenta na e sitio a haci tur e parti patras di corte limpi y tambe e baki di matanan . nan a gradici pa e bon cooperacion ricibi di SIA, DOW, y ploegnan di BCI pa e limpiesa y e ploegnan di DOW cu a corta tur e matanan.
Den mesun linea, nan a manda ploegnan pa por a corta e matanan cu ta ubica pabao di Ministerio Publico cu tabata crece te ariba caminda y tabata stroba tanto peaton y autonan cu tin di core den e caya aki.
Alabes, ta bon pa informa cu riba caminda di Green Corridor tin hopi truck y pickup cu ta core sin cu ta tapa sushi cu ta transporta riba caminda, esaki ta bini door cu e conductornan no ta tapa e sushi cu un lona, tur dialuna mainta e caminda menciona ta lanta cu hopi sushi y cu ta un mahos bista pa turistanan cu ta transita riba e caminda aki. Hopi biaha a pidi e conductornan pa por fabor tapa e sushi cu ta wordo transporta, pero esaki no ta tuma luga.
Un mensahe na tur compania of personanan cu ta transporta sushi, pa tene bon cuenta cu e siguridad di otronan y ban tene e camindanan limpi, tur hende cu ta transporta sushi, por tapa esey cu lona ta un ley di Trafico y cu tin boet pa no tin lona pa tapa sushi cu ta wordo transporta. Tambe tin cu tene na cuenta cu tin camara riba rutanan di Aruba pa asina por tin un miho control.
