Den e prome rueda di prensa pa aña 2017 di plataforma E Forsa Nobo, Otmar Oduber & Andin Bikker a trece algun di nan punto di enfoke pa dilanti. E politiconan a papia riba e plan pa nan programa electoral y puntonan manera entre otro e maneho structural di finansas publico.

E presupuesto supletorio cu a wordo trata den Parlamento durante fin di aña ta uno hopi importante pa atende segun Sr. Oduber. “Mi a ripara cu tog no tabata tin e atencion manera cu mi a spera cu esaki lo tin mirando e consecuencianan financiero cu esaki tin.” E Forsa Nobo por a tuma nota cu tin un buraco basta grandi cu a wordo laga atras den e presupuesto 2016 segun Sr. Oduber ta splica. “Sumanan cu ya caba a cuminsa wordo aloca den e caso aki for di entradanan cu a ricibi pa un refineria cu mester cuminsa opera. Un refineria cu lamentablemente te dia di awe ainda no ta operando y no tin un bista cla ainda ariba e dia cu esaki lo cuminsa opera.” Sr. Oduber ta splica cu el a mira un suma di casi 30 miyon florin cu ya caba a wordo uza. Fondonan di traspaso di Valero pa refineria di Aruba cu a wordo autorisa den e caso aki pa Gobierno pa cubri e deficit cu tabata tin den e presupuesto. “Como tambe e pensamento pasobra un di nos punto di enfoke cu nos ta bay combersa cu diferente gruponan ta netamente e maneho structural cu mester existi pa nos finansas publico. No cu esaki cada biaha ta wordo tapa door di entradanan cu gobierno ta ricibi na un forma incidental.”

Segun Sr. Oduber den menos di un periodo di 1 aña por a mira cu e ministerio di Turismo, Transporte, Sector Primario y Cultura a genera practicamente 11 miyon florin. Esaki tabata placa adicional ariba loke tabata presupuesta den e presupuesto original di 2016. “Pero lamentablemente, practicamente 100% di e 11 miyon aki a wordo consumi door di otro ministerionan cu den e caso aki tabata tin deficitnan y surplus no tabata presente. Ta p’esey ta importante – anto nos por discuti esaki tambe – pa continua trahando cu eficiencia.” Sr. Oduber ta comenta cu e gobierno mester bira uno productivo cu ta sigura entradanan cu ta consistente. Ta den e filosofianan ey mes e entradanan principal di gobierno a bin di empresanan, departamentonan cu den e caso aki a wordo independisa. ATA a genera mas fondo di loke a wordo presupuesta inicialmente como tambe otro departamentonan manera Directie Scheepvaart y DTP segun Sr. Oduber. “A demostra di por genera mas fondo y por ta hopi mas eficiente te na e punto cu Directie Scheepvaart Aruba compara cu añanan anterior awe ta un departamento cu ta cubri tur su gastonan . Un departamento cu ta keda un surplus pa Aruba awo anto cu tabata costa anteriormente cerca di 3.5 miyon awe tur su gastonan ta wordo cubri y ainda tin mas posibilidad, ” e ta bisa.


Identidad autonomo

Sr. Oduber ta bisa cu e ta spera cu e direccion ta wordo continua mescos cu a tuma luga na Ansa NV y ATA. Pues pa sigui cu e proceso cu a wordo laga atras pa haci esaki un identidad autonomo pa motibo cu e rapport cu a wordo laga atras pa loke ta trata actividad maritimo ta provee hopi oportunidad pa independisa. Pues segun Sr. Oduber, e ta pa crea su mesun fondonan y genera mas fondo tanto pa e departamento, reduci gasto di gobierno y crea hasta entradanan adicional mescos cu ATA y Ansa ta haci pa gobierno di Aruba. Concluyendo y tocando riba e tema di traspaso di Valero, Sr. Oduber ta bisa cu: “A pesar cu nos a mira un presupuesto cu a wordo aproba caba, cierto momento bo ta puntra bo mes cuanto placa a resta di e suma aki sin cu te dia di awe nos tin un operacion di refineria. Mi ta kere cu Parlamento a vocifera su mes hopi cla riba e refineria aki. Cu nos ta kere den un refineria cu por genera trabao y entrada pa economia di Pais Aruba. Pero mi ta kere cu despues di mas o menos 1 aña cu nos tur ta corda for di Maart aña pasa a anuncia esaki, drentando ya caba den februari 2017 sin un perspectiva ainda di kico exactamente ta bay tuma luga.”