Siman pasa a termina cu un tremendo fiesta y show, pa inaugura e brug di mas bunita, y mas caro di Aruba. Nos a comprende cu e fiesta tabata gratis, cu e compania responsabel pa su construccion lo a tuma e gastonan pa nan cuenta. Nice, kier men cu nos ta bay page tres biaha: un biaha na capital y dos biaha na interes? Un splicacion cortico. E brug y e caminda nobo ta traha bao di un contract unda e compania responsabel ta busca financiamento, ta haci e construccion, ta mantene tur cos durante un cierto cantidad di aña acorda, y ta cobra un suma total, cu ta encera capital fia, interes riba esaki, plus ganashi di e compania. Nada straño na esey, solamente cu tur e proyectonan aki hunto ta un peso demasiado grandi pa nos, mirando e estado di nos financia publico. Awor, pregunta: e gastonan di e fiesta ta hinca den e prijs caba, of ta bay cobra nos extra pa esaki? Pasobra si ta extra, anto miho laga para, pasobra nan ta bay cobra esaki tres biaha: e suma mes, plus mas o menos dos biaha, si no ta tres, na interes durante e 29 aña cu nos ta pagando e baina aki. E ora nos por comprende cu e compania ta mas cu complaci pa ofrece un fiesta pa pueblo, pasobra hasta riba esey nan ta gana placa.

Naturalmente e gastonan di fiesta no ta nada compara cu e costo di e brug mes, pa no papia di e caminda tambe. Y ademas cu entre e proyectonan grandi entama pa e gobierno aki, bao di e capa di proyecto PPP (Private Public Project), esaki ta esun cu tabatin menos urgencia. Lo tin hende cu no ta di acuerdo cu e ponencia aki, pero nos por argumenta nos punto di bista. Tabatin tres proyecto grandi mas: renobacion di hospital, haf di container y e ringweg rond di Playa. Pone nos servicio medico al dia tabatin gran urgencia caba, aunke nos no ta bay discuti e otro alternativanan cu tabatin. E ringweg tabata un plan di hopi aña caba, cu en todo caso ta bay alivia e trafico cu mester pasa den Playa. Aunke aki tambe mester a actualisa e plan, pa duna prioridad na un ruta mas cortico pa bay area di hotel high rise y Noord, cu mientras tanto a bira e parti cu mas actividad y poblacion.

En cambio, e caminda pa San Nicolas no ta bay yuda tanto pa e fluho di trafico, pasobra e tin cinco rotonde aden cu ta bay ta obstaculo pa e fluho di trafico. No cu no tin obstaculo awor tambe, pero no mester pensa cu e fluho den e set up nobo aki lo ta hopi miho. Ademas e caminda di dobel via no ta yega San Nicolas; di Pos Chiquito te yega pariba ta e mesun caminda suf el a keda, cu tur consecuencia pa velocidad di trafico. Punto ta, cu nos ta gastando alrededor di 300 miyon florin pa gana, kisas, algun minuut di tempo den e fila di mainta y atardi. Tremendo.

Ademas, e caminda y brug sumamente caro aki a bin reemplasa un caminda y brug cu tin decadanan ta sirbi tur trafico entre e dos partinan di e isla. Riba rednan social ta circula comentario cu ta haci mofa di nos prome ministro, cu lo a declara den su discurso cu e temponan aya, ta cu boto tabata biaha entre e dos partinan aki. Nos no ta ni bay comenta mas aleu riba esaki. Tin cos mas importante pa critica. Y un di e cosnan mas importante pa critica ta e manera con a enfoca riba e caminda, y no e ciudad. Ora nos bisa cu e gobierno aki tin su prioridadnan kiboca, nos ta referi na esey. Den termino normal di desaroyo socioeconomico, si bo tin un caminda caba, bo no mester haci esaki e obhetivo mayor di bo inversion. E obhetivo mayor mester ta e ciudad, cu tin mas di trinta aña ta sufri. Anto bo no por hinca 300 miyon den e caminda, y bo ta hinca, talbes, 30 miyon den e ciudad mes. Si gobierno lo a bin cu un plan pa upgrade no e refineria, pero e ciudad, cu e placa cu awor a gasta na un brug y caminda nobo innecesario, imagina cuanto cos lo por a drecha den San Nicolas mes. Awor San Nicolas a keda manera un Cinderella, cu sapato di cristal na su pia, pero bisti cu e mesun pida paña na su curpa cu e tabatin prome.

Pero nos mester pordona e hendenan aki, pasobra esaki ta loke nan ta yama vision. En realidad e no ta nada mas cu e vision di politico cu ta desea di laga algo atras, cu nan no ta paga, pa despues por gaba nan nietonan cu loke ‘opa a traha pa Aruba’. E realidad en cambio ta cu ta nos nietonan  lo mester paga e regalo aki, mientras cu tur e espacio financiero necesario pa cos drechi a somenta. Den e caso aki miho nos bisa nos prome ministro: Thanks, but no thanks.