Daniel Kripper ta un Rabino di e sinagoga Beth Israel Aruba, conferencista, coaching spiritual y autor kende recientemente a wordo invita pa Center Lifelong Learning di Universidad di Aruba pa duna un presentacion tocante su buki nobo: “Vivir con mayúscula.”

Mas cu un presentacion di un buki, el a bira un oportunidad pa e autor gradua den Sociologia y specialisa den Psicologia Social por a bin cu un intercambio pensamento y conseho cu e publico presente.

‘Vivir con mayúscula’ ta un tipo di guia pa los cierto creencia cu ta limita nos, te hasta haci nos bida sin potencial. Den su buki, Kripper ta formula un invitacion pa bo por biba un bida integral for di un perspectiva spiritual. Esaki ta nifica pa bo laga un banda tur sorto di excuus y miedo, y pa bo asumi cu responsabilidad e timon di e barco di bo bida den un direccion di estado di plenitud y sentido.

Den su structura, e buki ta aborda varios tema vigente y cu nos ta sinti den nos propio cuero den nos bida diario, entre otro felicidad y miedo.

Felicidad.
Kripper a bisa cu felicidad ta un tema cu a wordo trata den Psicologia Positivo pa Martin Seligman mas cu 15 aña pasa y cu a wordo popularisa den nos tempo. Pa nan no ta existi un definicion di felicidad. Sino cu e ta un concepto mas subhetivo di cada persona. Pero si nan ta haci un diferencia entre bienestar y felicidad, cu tin biaha e dos concepto aki ta wordo bruha den otro.

Bienestar, manera e palabra mes ta bisa: bienestar kier men bo ta bon, bo ta biba cu comodidad, confortabel, trankil y saludabel. Ya sea cu bo ta gosa di bienestar economico, psicologico, etc… Pero bienestar material of economico no ta garantisa felicidad, segun Kripper.

El a aclara cu no ta existi un corelacion entre bienestar y felicidad. Un persona cu hopi placa of miyonario no necesariamente ta un hende feliz. Ya cu felicidad ta un ‘estado paden di curason’. Felicidad tin di haci cu cierto balornan, principalmente ora cu bo ta haya un sinti di bo bida.

“Bo no ta feliz, si bo no sa pa kico bo ta biba.” Kier men cual ta bo vision y proposito di bo bida, el a laga sa.

Miedo.
El a bisa cu miedo ta un emocion natural. Nos tur ta sinti miedo den cualkier momento. E ta haya cu ta bon cu nos por sinti miedo, ya cu esaki ta un ‘suerte’, papiando biologicamente. Pasobra danki na e miedo nos ta bira mas cuidadoso y preventivo.

E hende balente –segun Kripper- no ta esun cu no tin miedo. Sino cu e ta un hende cu tin miedo, pero e ta capaz di controla su miedo. E ta haya cu tur cos ta cuestion di ekilibrio, ya cu ora e miedo ta bira algo grandi y e ta cuminsa controla bo bida, e ta bira un problema. Kier men ora cu e miedo ta domina bo y bo ta bira un preso di e miedo.

Pero si bo ta reflexiona, bo ta haya sa cu tin biaha bo tin miedo riba algo cu no ta existi. Of miedo inconsciente cu ta bin for di tempo cu bo tabata mucha. E miedo tin como base con bo mayor a lanta bo: “”No haci esaki mi yiu… no haci tal cos mi yiu…” Ora cu esaki ta bira excesivo, e ta contribui negativo pa aumenta bo sentimento di insiguridad.

E miedo tin biaha ta blokia of limita bo persona di logra cosnan importante den bo bida. “Si bo ta biba constantemente cu miedo, bo no ta yega leu…” El a bisa cu tin remedi pa combati e miedo. Tin terapia pa e hendenan cu ta biba yen di miedo cu por yuda bo pa trece e balansa necesario den bo bida.

Vivir con Mayúscula.
Durante un entrevista cu e Rabino di e comunidad Hudiu na Aruba, Daniel Kripper, a duna na Radio Jai riba e presentacion di su buki na Buenos Aires (Argentina), el a laga sa cu a skirbi e buki pa yuda pa e hendenan cu kier Biba cu letra mayusculo. Hendenan cu kier bira mas consciente di nan bida. Pa bo por mira otro manera di realisacion di bo bida uzando como sosten bo propio fortalesa y asina logra realisa bo soño. Pasobra na final, esaki ta nifica biba cu mayusculo, segun e autor. Kiermen cu bo por biba den grandi y desaroya tur bo potencial y biba bo bida den un sentido di realisacion di felicidad y plenitud. Loke nan ta yama den Hebreo: Shalom. Cu no solamente ta nifica no- conflicto, sino un paz interior di plenitud y auto-realisacion.

Daniel Kripper su buki ta disponibel via E-books, tambe pa medio di Amazon Kindle. E tin su website: www.danielkripper.com unda el a yega di publica mas articulo tocante su buki.