Antropologo Colombiano di origen Guajiro, sr. Weildler Guerra a presenta su buki “El Mar Cimarrón” durante un recepcion cu a tuma luga na Museo Arkeologico Aruba (MAA) recientemente.
E buki aki ta trata riba lama Caribe cu e indjan Wayuu di Guajira ta yama como “Mar Cimarrón”. Segun sr. Guerra, lama di Caribe ta esun cu ta uni nos regionnan y cu a bira masha fundamental den e historia di nos pueblonan tanto continental como insular. Igualmente el a laga sa cu hopi pregunta di arkeologia y historia tocante Caribe, ta haya contesta cerca e pueblonan Indjan bibo manera e indjan Wayuu.
E buki aki di mas cu 150 pagina y masha bunita edita ta refleha e cooperacion entre Aruba y Colombia riba tereno academico. E un trabou cu e antropologo aki ta bin realisando pa mas cu 11 aña. Durante e periodo largo aki el a yega di bishita cantidad di comunidad Wayuu situa den e teritorio di costa di Guajira na Colombia.
Importancia pa Aruba
Sr. Guerra a declara na Bon Dia Aruba cu e buki aki ta un documento importante pa Aruba su pueblo. El a bisa cu no mester lubida cu Aruba a wordo pobla pa indjannan di lenga Arawak, manera e indjan Caquetio cu tabata di e mesun famia di e indjan Wayuu. “Ban bisa nan tabata casi primo di e indjan Wayuu”, el a bisa.
Nan tabata comparti un famia linguistico y nan a comparti parti di nan historia tambe, segun e autor aki. El a agrega cu durante e prome mita di siglo 16, indjannan di Aruba a bay traha den buskeda di perla den Cabo de La Vela na Guajira. Pues e region aki tabata un sitio caminda a wordo hiba indjan di Aruba como sambuyado di perla.
Igualmente el a laga sa cu e conocemento di e indjannan aki riba lama por yuda nos pa compronde un poco mas riba historia di Aruba. Sr. Guerra a indica cu esaki ta elemento fundamental pa e arkeologonan. E ta un experto den etnografia cu ta un specialisacion di antropologia cu ta traha riba comunidad bibo. E specialisacion aki ta permiti descifra caracteristica cultural pa medio di e instrumentonan cu e comunidad indjan actual ta uza habitualmente .
“E ta yuda nos pa compronde un poco, ya cu Caribe ta un gran teritorio, pero nos por haya pistanan cu lo por yuda investigadonan futuro pa compronde e apropiacion di lama como teritorio di e pueblonan pre hispanico”, el a declara.
El a aclaria cu e buki ta referi specificamente na e indjan Wayuu y su relacion cu lama. Pues esaki ta e prome buki cu ta wordo skirbi tocante e indjan Wayuu y su conocemento riba lama, logicamente lama Caribe.
Conseho y financiamento
Pa skirbi e buki aki, sr. Guerra a conta cu e baloracion y conseho di e team di investigacion di MAA. Ademas e proyecto aki a wordo financia pa Romar Trading. E empresa aki a mustra su interes tocante e lasonan di cooperacion entre ambos pais. Tambe el a laga sa cu su prome debe di gratitud ta cu Aruba su pueblo. Un isla cerca geograficamente cu e peninsula di Guajira. “Arubiano y Guajiro, nos porcion di tera semi seco, a comparti hunto for di hopi siglo den e diversidad cu Caribe ta: herencia cultural, linguistico Arawak, presencia dramatico di Europa y Africa den nos historia…”, el a bisa.
