Minister di Enseñansa y Deporte, Endy Croes hunto cu colega Minister di Husticia y Asuntonan Social, Rocco Tjon a bishita Compleho Deportivo Guillermo Prospero Trinidad na Dakota. Esaki ta en conexion cu e trayecto di Buitenprojecten di Instituto Coreccional KIA cu a inicia siman pasa, unda ta brinda e prisoneronan un oportunidad di traha pafo di KIA.
Segun un comunicado di gobierno, esaki tabata un colaboracion entre Ministerio di Enseñansa y Deporte y Ministerio di Husticia y Asuntonan Social, den cual e detenidonan di KIA lo percura pa e mantencion y diferente trabao di e facilidadnan deportivo y scolnan.
A inicia cu e trabaonan na Compleho Deportivo Guillermo Prospero Trinidad, comokiera cu dia 8 di juni proximo e wega clasificativo di CONCACAF entre Seleccion di Aruba y Seleccion di Curaçao lo tuma luga den e stadion na Dakota.
Segun e comunicado, esaki ta un desaroyo sumamente positivo, mirando cu e ta contribui pa e resocialisacion y reintegracion di nos prisoneronan den nos comunidad ta mas exitoso, consecuentemente disminuyendo recidivismo. Ademas di esaki, e ta disminui e gasto di diferente facilidad deportivo y di scol.
Ta premira cu den transcurso di otro siman, nan lo termina di verf Stadion GPT na Dakota.
