Tin un ‘bug’ basta serio den e plataforma di video yamada di Apple, FaceTime, cu ta visibel riba rednan social e dianan aki, y pa cual 9to5mac a manda un alerta: bo por yama un persona via FaceTime y scucha nan riba e microfon di nan iPhone, sin importa si e persona a contesta e yamada of no.
Pidi pa comentario, un vocero di Apple a bisa: “Nos ta na altura di e problema aki, y nos a identifica un fix cu lo wordo lansa den un update di software e siman aki.”
Independientemente, The Verge a confirma cu e ‘bug’ ta traha, uzando dos iPhone 12.1.2 den nan oficina. E ta cuminsa cu yama un persona via FaceTime video uzando e app riba e iPhone. Prome cu e persona contesta, bo por swipe ariba pa añadi bo mesun number di telefon na e yamada. Unabes bo añadi bo mes, FaceTime inmediatamente ta asumi cu ta un video conferencia activo, y ta cuminsa manda bo e audio di e persona cu bo ta yamando, maske nan no a contesta ainda.
Esaki ta nifica cu si bo mira bo iPhone ta ring cu un yamada di video di FaceTime, ta posibel cu e persona yamando bo por scucha bo via bo microfon prome cu bo contesta. E ‘bug’ ta rekeri un OS cu ta sostene Group FaceTime pa traha, obviamente. Pio ainda, si un di e yamadanan ‘falso’ aki ta tumando luga, si e recipiente ta primi e boton di ‘power’ of ‘volume’ pa ignora e yamada, no unicamente e ta manda e audio, sino e ta cuminsa manda video tambe. Te awo, probablemente e miho defensa ta pa paga FaceTime, mediante bay riba settings, y primi e switch eynan. Riba Mac, por paga FaceTime door di habri e app, despues bay den Preferences, y kita e check riba ‘Enable this account’.
Segun informacion di CNET, sinembargo, Apple a paga Group FaceTime temporalmente pa asina controla e ‘bug’. Despues, CNET a purba re- crea e experimento cu e ‘bug’, sin resultado, locual ta mustra como si e ‘bug’ ta bou control.
Potret di AppleInsider.
