Recientemente riba rednan social, tabatin rumornan tocante e salida for di e grupo musical Buleria di e cantante Jair Buddy Vesprey, miho conoci como “Buddy Love,” caminda hasta a insinua cu e banda aki no tabata paga su musiconan manera mester ta y cu e no ta cu Buleria mas.

Debi na rumornan riba rednan social na unda tabatin basta comentario di parti y parti, ayera e cantante a duna di conoce su band’i medaya, caminda el a pidi dispensa na su famia, amistad y fanaticonan cu tabata preocupa pa su bienestar.

E post a cuminsa di e siguiente manera: “Ta duel mi profundamente cu bo tin cu lesa esaki di e forma’ki. Mi kier a cuminsa mi post, cu por ta un poco extenso, pidiendo di curason, mi disculpa na tur mi amistadnan, famia y fanaticonan cu por ta preocupa pa cu mi bienestar. El a tuma mi algun dia pa purba procesa y analisa e situacion purbando di keda calmo, mente friu y sinti tur locual mi mester a sinti prome cu reacciona.

Awendia ta facil pa subi social media, cuminsa un topico of haci statements libremente. Cu por tin su consecuencia positivo of negativo pa cu un persona of organisacion su imagen, salud mental y hasta carera profesional.

“Den mi caso, den transcurso di ultimo dianan, rumornan tabata circula cu “BuddyLove” no ta forma parti mas di Buleria pa motibo di mi ausencia n’e ultimo presentacionnan.

“Mi kier a cuminsa na aclaria, cu Buddylove no ta ‘perdi’ mucho menos ‘scondi’ manera speculacion y rumornan riba diferente pagina a stipula. BuddyLove ta den Buleria keto bay.

“Cu e post aki mi ta bay purba splica e motibo. Mi ta bolbe menciona cu mi ta purba, te cu ainda mi mes ta hay’e dificil pa compronde, expresa y acepta e emocion y pensamento nan aki.

“Cu bo permiso, laga mi conta un tiki mas di mi mes como persona.

 

“Esnan cu conoce mi sa cu mi tin un smile na mi cara tur ora cu mi por. Y cu mi ta trata turrrr y turrr hende cu mas respet y cariño cu mi por. Mi ta un tipo di persona cu ta dedica cuerpo y alma, tur mi energia y sodo cada biaha di nobo ora di un presentacion.

“Pero tras di un smile, tambe tin e otro banda di mi cu ta luchando algun tempo caba cu ansiedad. Cu ta pone cu tin momento mi no ta sinti mi den e miho estado emocional y/of fisico pa duna tur di mi banda. Y den transcurso di tempo mi a siña cuminsa pone mas atencion y tende di mi curpa. It can be tough and for a while now it has been tough having that smile constantly on my face and making you all constantly proud, while not feeling at my best sometimes.

“Tur esaki ta cos nan cu mi a comparti caba cu e maneho di banda. Na inicio tabata tin comprension, ayudo y promesa pa mas consideracion. Pero cu transcurso di tempo mi tabata sinti mi mas y mas isola, ademas cu mas angustia. Cos nan chikito cu antes mi tabata por a “brush off” a cuminsa pisa mas di locual mi por carga.

“Mi no ta un “artista” pa ta un “artista”. Mi no ta biba pa e “fama” ni e “atencion”. Mi ta haci’e pa e ARTE. Pa laga ami y abo, aunke ta pa un rato so, sinti tuurrr e bon y e tambe e malo di kico ta nifica ser hende, den forma di mi bos, musica, energia y presentacion. Y mi a cuminsa acepta cu si esey kiermen cu tin dia cu e no ta bay, e no ta bay. And it’s OK.

“Ta importante pa nos cuminsa focus mas riba nos salud. No solamente papia di dje, pero actua tambe accordingly. Tende mas di bo curpa y mente, paso al final nos bienestar tin cu bin prome, paso sin dje, no tin nada.

“Y na tur usuarionan di medionan social, ban ta mas hende, pensa bon prome bo actua, skirbi y/of insinua cosnan. Paso sin cu bo sa bo por daña imagen di un persona, perhudica su salud mental y of carera, sin tin mester.

“Yegando na e parti final, mi kier extende mi mil y un disculpa di curason na mi fanaticonan cu tabata spera mi na e presentacionnan. Na mi coleganan y maneho di Buleria danki p’e pasenshi y comprension. E no ta facil pero mi ta maak e goed.

“Mi ta sinti cu mi por comparti mas, pero mi ta kere cu n’e altura cada un di boso cu ta sigui mi di cerca sa con hopi mi ta balora mi privacidad. Laga mi ripiti y enfatisa cu BuddyLove den Buleria ta keda un hecho, mas sigur cu e salida di solo diario.

“Hopi amor y cariño pa cada un cu a expresa y manifesta nan mes cu boso bunita palabra nan di sosten n’e momento nan aki y di forma incondicional, esaki ta algo cu sigur mi ta aprecia di lo mas profundo di mi curason. BuddyLove.”

Buleria tambe a splica cu nan maneho semper a demostra compasion y comprension pa e situacion personal di Buddy, pero despues di varios siman di ausencia na varios ensayo y presentacion, e situacion a bira mas preocupante.

“Den ultimo dianan, maneho a logra comonucia cu Buddy y a reuni extensamente cune, maneho di Buleria y Buddy a yega na cierto acuerdo y e relacion profesional ta continua.”

Di mesun manera a post aki a haya basta reaccion di apoyo y di comprension na e musico cu no ta pasando den su miho momento y cu lastimamente pa via di comentarionan cu menos bon intencion, e mester a bin dilanti y splica kico ta sucediendo, sperando cu proximamente por mira un BuddyLove den scenario cu hopi energia y enfoca riba su salud mental y mehoracion.