Mi hendenan! Mi ta spera boso tur a gosa di carnaval. Aki aya mi a mira potret riba Facebook, mi so ta pensa mi hendenan si ta bunita. Bruha, loco, sinberguensa ta mi hendenan tog. Min kier tende. Pero bon, ban papia. Un tiki di tur cos pasobra e siman tabata yena cu diferente locura.
Pa prome mi ta bon amarga cu mi a perde carnaval okay. No pasobra mi ta worry mucho cu parada, sino pasobra tur hende tabata gosa pues niun tabata tin tempo pa duna mi atencion. Mi telefon tabata seco henter weekend, schandalig mi ta haya e cos ki. Ki haci, esey ta e prijs di ta leu. Mientras boso tabata na Carnaval, ami mi a bay un fiesta Caribense na Amersfoort kere mi ta bay haya ambiente luga tabata djis par di Hulandes ta baila poco stijf. Pero laga nan gosa yiu, baila malo pasa bon esey tambe mag tog? Boso mester a wak nan ta baila salsa, un dos tres un pasito dilanti, un dos tres un pasito pa tras pero niun tiki ritmo. Sikiera tabata tin pastechi, sopi di carni y johnny cake pues mi no por keha.
Bayendo bek Utrecht, tabata tin yen hende den disfraz na station. Ma te hasta wak un grupo di 6 mucha bisti manera pineapple y un grupo di guy bisti na dinosaurio. Mi tabata puntra mi mes ta kico ta pasando akinan, pasobra Halloween ta te october? Luga mi amiga a bisa mi cu nan tambe tin carnaval y esey ta nan manera di bisti. Wel, mi a pensa riba tur nos carosanan, pluma y payet y con luhoso nos paradanan ta y pa un momento ma lubida cu Hulanda ta e pais grandi y ta anos ta e isla chikito. Pakico nos ta pantayero asina mi hendenan? Ta henter ora nos tin cu show up y show out. Pero bon, esey ta parti di nos carisma.
Mi ta pensa hopi riba Aruba ultimamente, mi ta pura juni yega mi bay vakantie wak mi mama. Mi a fada di scol, di e tempo shinishi, di e rutina. E prome aña Hulanda tabata leuk, tur cos tabata nobo y te hasta coy bus tur dia tabata mustra manera un experiencia. Pero awo mi no ta sinti asina mas, awo si mi tin cu motiva mi mes tur dia pa lanta di cama y bisa mi mes “bo ta akinan cu u n meta”. Mi amiganan ta bisa mi cu e isla ta na werki, cu no tin nada di haci, cu miho mi bay keiro den Europa na luga di bay Aruba. Entre Otmar cu Marisol, Tsunami cu nan mil y un relato di prensa, entre wakiendo y mirando y tur nos foutnan gramatical, tog mi ta pensa cu ta bal la pena bin, sikiera pa sinti un poco drama, hinca poco saus den mi bida seco.
Pa un sociedad cu ta asina enfoca riba individualismo mi ta haya pret con hopi e palabra “doe normaal” ta wordo uza na Hulanda. Aunke por haci locual cu mi kier, di un manera sinembargo mi ta sinti hinca den un caha mescos cu na Aruba. Den un poema yama “songs for flight” mi poeta faborito Alysia Harris ta bisa “Mi a descubri, cu Europa no a cambia mi bida. El a djis haci cas algo mas facil pa haya riba un mapa. Tin ora nos ta lubida esey, cu bo curpa ta un prizon bo ta hiba cu bo tur caminda y bo ta cuestiona pakico e bista semper ta desde bo cel” Y asina e ta, tur cos ta depende di con bo ta sinti paden. Un pais no por haci bo bida, ta hende ta haci bo bida. Y bida, bida na final di dia ta amor. Pa idioot y kens cu e ta zona, esey ta e berdad. Bida ta tocante experiencia y kende bo tin rond di bo. Y si felicidad ta wordo defini pa status y placa, sin berguensa mi ta bisa cu mi lo prefera ta un cahera na Aruba cu un manager na Hulanda.
