Mas di un aña pasa Bon Dia Aruba a publica algun imagen di e situacion na pia di e brug riba Lagoen na L.G. Smith Blvd., cu tabata visiblemente afecta unda e capa di pleister tabata cayendo, lagando e material abao, incluyendo e armamento di hero frustia, sunu y na merced di nos clima, cu ta conoci pa afecta tur tipo di metal.
Den e dianan aki nos a bolbe tira un vista riba e asunto aki, y loke por a comproba cu no tabatin ningun obra di mantencion o reparacion a tuma lugar, cu consecuencia cu e situacion no a bira mihor, al contrario. Aunke e ringweg nobo ta kitando hopi trafico pasando riba Smith Blvd. Ainda por mira diariamente cu esaki, incluyendo e brug aki, ta di gran importancia pa trafico en general.
Gobierno recientemente a reconoce esaki tambe dunando e parti di Smith Blvd. dilanti Bestuurskantoor un capa di asfalt nobo, loke tabata necesario. Sin embargo, lo ta bon pa corda riba e parti aki tambe, cu no ta directamente visible.
Esaki ta solamente un di e casonan unda por constata cu no ta existi e debido mantenimento cu por spera di e autoridadnan encarga cu esaki. Ta conoci generalmente cu haci e inversion na tempo den mantenimento adecua, finalmente ta sali mas economico cu reparacion costoso, haci den pura despues, ora ‘awa a pasa hariña’. Ta di spera anto cu e caso aki lo haya e atencion mereci pronto.
