Cambionan chikito pero importante lo tuma luga e siman aki riba caminda principal di Playa bay San Nicolas den cuadro di e proyecto di construccion di Green Corridor.
Un di e cambionan aki ta esun entre e crusada di Mahuma y Ser’i Thijshi caminda e automobilistanan mester tene cuenta cu parti di e caminda nobo lo bay den funcion.
E dos conexion ey lo bay ta den uzo pa tur trafico locual lo facilita pa e contratistanan tin oportunidad di sigui traha, sin afecta e fluho di autonan riba e caminda importante aki. Tur e desvio aki segun Jossy Kock di DOW lo wordo indica riba e borchinan cu nan lo pone riba caminda.
E cambio aki lo facilita pa e contratistanan por sigui traha riba e rotonde di Mahuma y tambe riba e caminda existente entre e rotonde di Mahuma y Ser’i Thijshi. “Nos ta pidi pa e automobilistanan tene bon cuenta cu e cambionan di trafico cu lo bay tin.
Tambe e contratistanan ta trahando riba e rotonde di Kibaima. Ya caba e rotonde aki a cuminsa forma caba di banda di panort. Unabes cu e parti aki keda cla, nan lo bay haci e cambionan necesario tocante e rotonde aki.
Ing. Kock a pidi encarecidamente pa tene cuenta cu e cambionan y desvionan riba e caminda aki, considerando cu no ta na porta di e temporada di fiesta di Pasco y Fin di Aña. E ta pidi henter comunidad pa carga un tiki pasenshi pa asina duna e contratistanan espacio pa traha y por bin cla cu e proyecto di Green Corridor mas lihe cu ta posibel.
Brug Spaan Lagoen
Tocante e construccion di e brug di Spaan Lagoen, Kock a laga sa cu pa fin di luna di maart 2017, e brug aki lo ta practicamente cla.
E siman tras di lomba caba a tuma luga un echo importante ora cu ambos extremo di e brug a topa na halto creando un arca perfecto. Tambe e support nan mes a wordo conecta; mientras cu parti di e construccion temporal lo bay cuminsa desmantela nan; y lo instala e pinnan principal cu ta bay sostene e caminda aki.
Camindanan
E contratistanan tambe ta trahando riba e diferente camindanan patras di e caminda principal cu ya caba a cuminsa haya asfalt. Tambe nan ta trahando riba e parti di e acera nan di Savaneta bay ariba, unda nan ta poniendo klinker nan y tambe e parti di San Nicolas. Full e ruta di Weg Fontein; Weg Seroe Blanco, Brasil y Rooi Cochi tambe ta den preparacion pa keda cla cu e trabou di e proyecto.
Tambe den e siman venidero nan lo concentra riba e area pazuid di e proyecto cu ta e parti di Savaneta bay patras caminda nan lo cuminsa traha riba esaki.
