(AP) – Bruce Willis lo retira como actor despues di a ser diagnostica cu aphasia, un condicion cu ta causa e perdida di e habilidad di compronde of expresa su mes, su famia a bisa diaranson.
Den un declaracion publica riba Willis su cuenta di Instagram, e actor di 67 aña di edad su famia a anuncia cu Willins recientemente a ser diagnostica cu aphasia y esaki lo impacta su habilidadnan cognitivo. “Como resultado di esaki y cu hopi consideracion, Bruce lo retira for di e carera cu ta nifica asina hopi pa su persona,” e declaracion a bisa, firma pa Willis su casa, Emma Heming Willis, ex-pareha Demi Moore y su 5 yiunan, Rumr, Scout, Tallulah, Mabel y Evelyn.
“Nos ta navegando esaki como un famia fuerte, y tabata kier a inclui su fanaticonan pa motibo cu nos sa con hopi e ta nifica pa boso, y di mesun manera boso pa e,” nan a bisa “Bruce semper ta bisa ‘biba bo bida’ y hunto nos ta plania di haci esaki.”
Tin hopi causa potencial pa aphasia. Hopi biaha e ta pasa despues di un ataca di curason of un herida den cabes, pero tambe por desaroya gradualmente pa causa di un tumor di celebro of malesa cu ta causa daño durante tempo, di manera similar na Alzheimer’s. E ta trata cu terapia di comunicacion y siña maneranan pa comunica cu no ta verbal.
Willis su famia no a revela kico a causa su aphasia. Representantenan di e actor a nenga di duna comentario.
