Diaranson 1 di september Registro Civil y Censo a introduci cambio den e codigo civil di Aruba. Un di e cambionan aki ta e Registracion di Partner (geregistreerd partnerschap) di mesun sexo of sexo opuesto. Den un entrevista cu Bruce Ponson, presidente di Fundacion Orguyo Aruba, e ta splica kico e cambio aki ta nifica pa e comunidad LGBTQ+ na Aruba.
Fundacion Orguyo Aruba a wordo lanta na aña 2019 cu e meta principal di percura pa igualdad ta existente na Aruba, specificamente igualdad legal. Sr. Ponson ta splica cu Fundacion Orguyo a tuma e decision di persigui e ruta hudicial y asina hiba gobierno di Aruba corte. “En total nos a participa den 3 caso di cual tur tres nos a gana caminda a wordo dicta door di hues cu Land Aruba no ta cumpliendo cu nos leynan, no ta protegiendo nos leynan lo suficiente”, Sr. Ponson ta bisa. “Pa nos e no tabata suficiente paso e no a wordo ehecuta door di gobierno pa bira ley y nos ta den Hoge Beroep aworaki”.
Sr. Ponson ta bisa cu Fundacion Orguyo ta desea pa e proximo gobernacion, y e regeer akoord, refleha cu sociedad ta reconoce legalmente igualdad. E ta splica cu e parti ceremonial di matrimonio ta e parti importante, lo mas importante ta e derechonan cu ta bin cu e matrimonio.
“Es decir tur locual un matrimonio ta duna di proteccion, por ehempel si un persona den pareha mester bira malo y e mester di atencion medico y cu su pareha di 20 of 30 aña por bisa kico e lo desea di haci. Si nan traha un cas hunto y un mester fayece, e otro por keda gosa di loke nan a produci hunto. Esakinan ta detayenan pero pa un pareha heterosexual e ta regla pa ley automaticamente. Pa un pareha homosexual esey no ta e caso. Matrimonio ta loke den media y vooral pa publico ta wordo menciona hopi biaha, pero e parti ceremonial no ta importante, ta e contenido legal cu e ta bin cune ta importante”, el a splica.
Dia 9 di augustus Fundacion Orguyo tabatin e oportunidad di sinta cu Minister President demisionario y formado di gobierno, Sra. Evelyn Wever-Croes. Sr. Ponson a bisa cu durante e reunion aki, e puntonan aki di suma importancia a wordo treci pa dilanti. “Basicamente nos a splica nan cu di e parti di comunidad nos ta wak e cu si nos ta contribui na comunidad, entre otro den nos trabounan, contribui na belasting, tur e premienan di sociale gezondheid etc., cu nos no ta wak un motibo pakico lo tin un discriminacion y nos no por haya e derechonan igual”.
“Nan no ta cumpliendo cu tratadonan internacional cu Aruba ta forma parti di dje ni tampoco e derechonan humano basico cu Union Europeo ta boga pe dentro di e Union Europeo y tambe internacionalmente”, el a agrega.
E cambionan den union civil cu a drenta na vigor dia 1 di september ta un gran paso den e bon direccion pa e comunidad LGBTQ+, pero Sr. Ponson ta splica cu esaki toch ainda ta trece algun discriminacion cune. “Dia 1 di september e cambio den union civil ta bin na vigor, pero esaki ya caba den su elemento tin discriminacion. Un ehempel un pareha homosexual cu casa y haya yiu, e union civil no ta proteha nan como famia pasobra e derechonan di afstamming no ta regla den e union civil cu nos ta bay haya dia 1 di september, eynan caba ta un discriminacion cu ta keda existi”, el a bisa. “Y e derechonan humano di Union Europeo y e tratadonan cu nos ta forma parti di dje ta bisa cu e ta posibel pa no tin matrimonio habri pa parehanan di mesun sexo, pero nan merece y e estado tin e deber di duna nan e proteccion igual”.
Sr. Ponson ta bisa cu di parti di Fundacion Orguyo nan ta spera cu den e regeer akoord cu e gobierno nobo yega na dje, nan por tene consideracion di e derechonan humano cu na Aruba lastimamente no tin. “Nos ta spera cu di e union civil cu a bin na vigor dia 1 di september nan por bouw op mas den futuro pa agrega e derechonan cu aworaki cu ta ausente eigenlijk den ley”, el a agrega.
