Diabierna ultimo a tuma luga un interupcion di coriente na varios bario rond di Aruba caminda WEB N.V a sigura cu tabata trata di un brown out pa via di leakmento di fuel den turbina di gas, di su parti N.V ELMAR a duna un conferencia di prensa e mesun dia ey pa 10or di anochi.

Jhonatan van der Linde representante di N.V ELMAR a splica cu pa 4.45 atardi nan a haya un alarma den nan sistema di transmision di distribucion coriente cu e feeder di Elmar number 5 a ser elimina , loke ta nifica cu WEB a kita e coriente di dje, na mesun momento nan a tuma contacto cu WEB pa nan por haya sa kico ta e origen y e motibo di pakico esey a sucede caminda nan a haya sa cu tabatin problema cu un gasturbine.

Despues di esey por a lanta un otro generator unda nan a cuminsa pone coriente back na un parti chikito di e area afecta, “despues di basta rato cu nos a keda warda pa WEB duna nos un OK pa sigui suministra coriente na otro barionan a dicidi pa kita coriente di otro barionan residencial pa por duna e parti comercial coriente back, manera boso sa e parti comercial ta hopi importante pa isla di Aruba y nos tambe tin esey den mente. El a splica.

E feeder di Elmar number 5 ta un transformer principal di Tanki Lendeert y tambe tin otro di Pos Abou, ta suministra coriente na gran parti di low y high rise area di hotel loke ta nifica cu comercio di e parti aki a ser afecta.

Te 10 or di anochi di diabierna ultimo ainda tabatin algun areanan sin coriente manera San Nicolas, Primavera, Paradera, Dakota, unda nan tabata na spera pa WEB duna un luz berde na nan.

E demanda cu nan ta hayando den ultimo dianan segun van der Linde a expresa ta riba 130 megawatt, tambe el a sigura cu ta mas halto compara cu e demanda di aña pasa y esey ta debi na calor “boso por wak cu awe (diabierna) e biento a cay.

Igualmente, el a informa cu nan tin un sistema full automatisa, na november di aña pasa nan a automatisa un stacion na Paardenbaai, na februari ultimo nan a automatisa na Tanki Lendeert y ora WEB duna ELMAR un OK nan ta pone coriente back.

Na Santa Cruz tambe a tuma luga un otro incidente cu tabata trata di un auto cu a dal un palo di luz na unda ELMAR a sigura cu nan tecniconan a haya dificultad pa saca e palo for di e tera y nan tabata expect cu pa un tempo di dos ora lo por a restaura coriente back den area di Barcadera y Sabana Grandi, ademas a comenta cu tabata un hecho aisla di lo cual a pasa cu e brown out.

Un otro representante di ELMAR a conseha comunidadnan pa ta consciente riba consumo di coriente na unda te ainda e temporada di mas calor no a yega ainda pero si ta posibel pa ciudadanonan purba paga luznan si un persona no ta den area ey di e cas y asina tambe por yuda pa ta un poco mas consciente di e uso di coriente.

Segun WEB: Leak di fuel den turbina di gas ta e causa di e brown out di diabierna ultimo

Un leak di fuel den e turbina di gas den planta di WEB tabata e causa di interupcion di coriente na diferente bario, diabierna 3 di mei den oranan laat di atardi, manera nan a informa.

Debi na e leak y e peliger di candela no tabata responsabel pa mantene e turbina den operacion y conforme protocolnan di seguridad, personal di planta a haya nan mes obliga di baha e turbina di gas.

Reparacion di e leak a tuma su tempo pero despues a surgi tardansa na momento di reset y restart e turbina. En total a dura mas o menos 6 ora prome cu tur bario afecta a recupera nan suministro di coriente.

Generalmente ta usa e turbina di gas solamente den casonan di emergencia of ora demanda di coriente ta halto. Sinembargo esaki actualmente ta den operacion, door cu 2 di e motor RECIP ta for di servicio pa reparacion y un otro ta den mantencion regular di overhaul.

E caida di biento di diabierna te na 1-2MW na e mesun momento ey, tambe a pone cu no tabata tin energia di biento pa por a cumpli cu e demanda halto actual.

Compara cu aña pasa, e piek di demanda pa e periodo aki ta 20-25MW mas cu aña pasa. Debi na e situacion delicado aki, WEB ta haci un apelacion na comunidad pa usa coriente conscientemente y ta pidi su disculpa pa e inconveniencia.

Alabes gerencia di WEB a gradici teamnan di WEB y ELMAR pa e trabounan di diabierna ultimo pa a recupera coriente mas pronto cu tabata posibel.