Entre e 2,139 pasahero biahando abordo di Eurodam di Holland America, 86 a reporta di ta malo durante su biahe actual, hunto cu ocho miembro di tripulacion, segun Centro pa Control y Prevencion di Malesa Mericano a bisa. Nan sintoma principal tabata sacamento y diarea causa pa norovirus. E barco recientemente a pasa den islanan ABC.

Esaki a keda reporta den un articulo di USA Today. E barco a bandona Port Everglades na Florida dia 30 di december, segun CruiseMapper. Un vocero di Holland America a bisa cu e “casonan tabata mas tanto leve” y a resolve rapidamente. “Nos a inicia protocolnan reforsa di sanitacion den conhunto cu Centro di Control y Prevencion di Malesa Mericano (CDC) pa minimisa mas transmision, incluyendo desinfeccion continuo di e barco,” nan a bisa USA Today den un declaracion riba e-mail.

Pasaheronan abordo di e crucero Eurodam a post riba e grupo di Facebook ‘Holland America Cruise Tips’ tocante nan experiencia. Usuario Susan Martinez a post: “Nos ta actualmente riba e Eurodam. Tur hende, please laba boso man cu awa y habon. E norovirus ta plamando lihe riba e barco aki,” tres dia pasa. Otro usuarionan a comenta cu critica pa e protocolnan di higiena di e crucero. Erin Shelby a bisa: “Talbes nan no mester pone tayo y bestek sushi riba e mesun tray for di cual nan ta sirbi. Y talbes nan no mester usa e mesun baki pa move serbete usa cu nan ta usa pa serbete limpi. Y posiblemente nan no lo mester usa e mesun pen henter dia na e stacion di Gelato. Idk… djis mi observacionnan.”

Joyce Gaufin a bisa cu no tabatin hand sanitizer “den e dispenser bayendo den Lido. Niun hende rekeriendo hende pa usa sanitizer. Hopi relaha considerando cu otro barco tabatin norovirus na mes momento.” Sinembargo, otro usuario a resalta cu “sanitizer basa riba alcohol no ta protege contra norovirus,” y a comparti un articulo splicando esaki.

Mientras tanto, CDC a registra 18 brote di malesa gastrointestinal abordo di crucero cu a cumpli cu e criteria pa notificacion publico na 2024. Norovirus tabata registra como e causa den 14 di nan.

Lectornan di Bon Dia Aruba por recorda cu luna pasa, CDC a confirma un brote abordo di e crucero Zuiderldam di Holland America Line, cu capacidad pa 1,964 pasahero. E barco tabata riba un biahe cu a sali for di Port Everglades na Fort Lauderdale dia 4 di december ultimo.

CDC a reporta cu 74 pasahero di e 1,923 cu tabatin abordo – cual ta menos di cuatro porciento di e pasaheronan – ademas di cuatro di e 757 miembro di tripulacion di e barco a bira malo, experimentando sintoma cu ta inclui diarea, sacamento, dolor di bariga, dolor di cabes y kentura. E cantidad di pasahero cu a bira malo ta bin aumentando desde cu e team medico di e barco a reporta e brote pa prome biaha na e CDC riba dia 11 di december ultimo, mientras e barco tabata pasando un dia na Aruba, segun cruisehive.com.

E barco a bolbe Florida dia 14 di december ultimo for di Caribe, unda e pasaheronan a bishita Half Moon Cay den Bahamas, Grand Turk den Turk and Caicos; Amber Cove den Republica Dominicana; Kralendijk na Bonaire, Willemstad na Corsou y Oranjestad na Aruba.

Brote di norovirus tipicamente ta mas comun den lunanan friu di winter – maske por ta menos temporal den sitionan mas cerca di ecuador. Frecuentemente ta asocia e malesa cu crucero, pero esey ta apenas un porciento di tur brote reporta, segun e agencia di salud.

Dr. Dean Winslow, un profesor di medicina y pediatria na Stanford Medicine a bisa USA Today anteriormente e luna aki cu brotenan usualmente ta tuma lugar den sitionan concentra, specialmente unda hende ta come y bebe. Esey ta inclui crucero, como tambe universidad, cas di cuido y “hasta hospital,” el a bisa.