Centro pa Control y Prevencion di Malesa (CDC) di Merca a confirma un brote abordo di e crucero Zuiderldam di Holland America Line, cu capacidad pa 1,964 pasahero. E barco ta riba un biahe cu a sali for di Port Everglades na Fort Lauderdale dia 4 di december ultimo.
CDC a reporta cu 74 pasahero di e 1,923 cu tabatin abordo – cual ta menos di cuatro porciento di e pasaheronan – ademas di cuatro di e 757 miembro di tripulacion di e barco a bira malo, experimentando sintoma cu ta inclui diarea, sacamento, dolor di bariga, dolor di cabes y kentura. E cantidad di pasahero cu a bira malo ta bin aumentando desde cu e team medico di e barco a reporta e brote pa prome biaha na e CDC riba dia 11 di december ultimo, mientras e barco tabata pasando un dia na Aruba, segun cruisehive.com.
Segun CDC, norovirus ta altamente contagioso y “e causa principal di sacamento y diarea, y di malesa transmiti via cuminda na Merca.”
E barco a bolbe Florida dia 14 di december ultimo for di Caribe, unda e pasaheronan a bishita Half Moon Cay den Bahamas, Grand Turk den Turk and Caicos; Amber Cove den Republica Dominicana; Kralendijk na Bonaire, Willemstad na Corsou y Oranjestad na Aruba.
E crucero a implementa su plan di prevencion y respuesta pa brote, cu ta inclui isola individuonan afecta y reforsa esfuersonan di limpiesa y saneamento pa limita transmision di e virus.
Den un declaracion na USA Today, un vocero di Holland America a bisa: “Nos a inicia protocolnan reforsa di saneamento hunto cu Centro pa Control y Prevencion di Malesa Mericano pa minimisa mas transmision.”
E linea crucero tambe a bisa cu e brote tabatin efecto riba e siguiente biahe di Zuiderdam, originalmente programa pa sali 3pm riba dia 14 di december. Pasaheronan programa pa sali riba e itinerario di siete dia aki den oriente di Caribe a keda informa di un retraso den embarcacion pa motibo di medidanan adicional di saneamento cu Holland America Line mester haci entre un y otro crucero.
