Den medionan di comunicacion local durante weekend tabata circula informacion tocante un brote di coronavirus entre personal di cuido di salud na Hospital Dr. Horacio Oduber. Hospital a cuminsa mesora cu contact tracing, y a descubri cu e contaminacion a cuminsa cu un bishita, segun e medio digital Antilliaans Dagblad a reporta.
Segun e relato di Antilliaans Dagblad, e trahadonan contagia ta den cuarentena na cas, den bon estado. Direccion di hospital a tuma e decision, den bienestar di e pashentnan, pa cancela cierto operacionnan cu tabata programa. E proximo dianan lo evalua cada dia e situacion y cua operacionnan por bay door.
HOH ta lamenta cu un persona cu a bin hospital a resulta di ta positivo despues. Desde maart aña pasa tin den hospital reglanan estricto na vigor pa preveni cu pashentnan ta core peliger di wordo contagia cu Covid-19. Bishitantenan ta bin cu tapaboca, pero den camber tin algun persona cu ta bin cerca di e pashent sin tapaboca. Den e caso aki, un pashent, sin ripara, a resulta contagia di e forma aki, y asina a transmiti e virus na e enfermero.
E reglanan ta cu pashentnan di covid den hospital no mag di ricibi bishita. Pa otro pashentnan ta conta cu nan por ricibi apenas un bishitante (adulto). Esey mester bay via cita cu duracion maximo di un ora. Tambe den camber di hospital ta obligatorio pa bisti tapaboca y mantene distancia social.
