Britney Spears no ta confia su tata, y no ta dispuesto pa sigui sconde nada na su siguidonan, ni na resto di publico.
Segun TMZ, tata di Britney, James S. Spears kier pa algun documento di e conservatorship di su yiu keda seya pa publico. Sinembargo, diahuebs ultimo e abogado di e cantante a presenta un documento den cual e ta opone na esaki.
Segun e publicacion, Britney ta luchando contra su tata pa nombra un co-conservator. James a insisti cu un abogado cu tabata involucra den su conservatorship pa varios aña wordo nombra co-conservator; pero Britney kier pa un persona independiente tuma decisionnan.
Den e documento, Britney ta splica cu no tin problema medico, ni ningun dato sensibel tocante su yiunan cu mester protege. Pa loke no tin problema alguno pa publico tin acceso na e documentonan en cuestion. “Britney mes ta opone vehementemente na e esfuerso aki di su tata pa mantene su lucha legal scondi como un secreto familiar”, su abogado a skirbi.
Segun e abogado, James a abusa e privilegio di secresia y hasta a pone e asunto aki mustra como un teoria di conspiracion na momento cu publico no tabatin suficiente informacion disponibel. “Leu di ta un teoria di conspiracion of un chansa, manera James a bisa medionan di comunicacion, den gran parti e scrutinio aki ta un resultado rasonabel y incluso predecibel di e uso agresivo di e procedimento di seyo na man di James durante añanan pa limita e cantidad di informacion disponibel pa publico.”
TMZ a reporta cu hunto cu e documentonan legal, abogadonan di Britney a entrega un articulo tocante e movemento ‘Free Britney’ declarando cu e ta purbando di recupera algo di autonomia personal den su bida. “Britney ta acoge y aprecia e sosten informa di cantidad di su fanaticonan”, segun e documentonan.
