(BBC) – Gobierno Britanico a manda un minister na British Virgin Islands despues cu un investigacion a haci un yamado pa bolbe na maneho Britanico.
Den un siman turbulento pa e teritorio di ultramar, su lider Andrew Fahie a keda aresta na Merca pa supuesto traficacion di droga y labamento di placa. Despues di su aresto, un rapport dirigi pa un hues Britanico a keda revela recomendando pa impone gobernacion directo for di London pa motibo di preocupacion pa corupcion.
Pero e lider di BVI a bisa cu e ta opone pa Reino Uni tuma control.
BVI ta un teritorio di ultramar Britanico, cu poblacion di mas di 35mil persona y ta consisti di mas di 40 isla, ubica den Caribe oost di Puerto Rico.
E ta opera como un democracia parlamentario, cu e premier actuando como cabes di e gobierno electo hunto cu Gobernador, kende ta nombra pa gobierno Britanico y ta representa e Reina.
Secretario di Relacionnan Internacional, Liz Truss, a bisa cu Amanda Milling, minister pa Teritorionan di Ultramar, tabata biahando na e teritorio pa combersacionnan cu Gobernador di BVI, John Rankin y otro figuranan senior riba diasabra. El a bisa cu gobierno Britanico lo delinea e proximo stapnan pa gobernacion di e isla despues di e discusionnan.
Sr. Rankin, kende ta recomenda como e persona pa tuma over maneho di e teritorio, a bisa cu su preocupacion principal lo ta e miho interes di poblacion di BVI. Sinembargo, Natalio Wheatley a bisa cu e teritorio ta opone esfuersonan di London pa impone gobernacion directo. “Kico esaki lo nifica den terminonan real ta cu no ta bay tin representantenan electo cu ta representa e pueblo di e districtonan y e teritorio den e Asamblea unda ta traha ley pa nos sociedad”, el a bisa. “Tampoco lo tin ministernan di gobierno pa avansa prioridadnan di publico ni un gabinete pa aproba politica. Tur e autoridad aki lo cay riba Gobernador.”
El a bisa The World Tonight di BBC Radio 4 cu BVI por adresa e problemanan di gobernacion sin mester resorta na gobernacion directo di Reino Uni – y a bisa cu e no ta kere cu pueblo di BVI kier mira suspension di e Constituciuon.
E crisis cu e islanan ta enfrentando a yega un climax diahuebs ultimo na momento cu a keda revela cu Sr. Fahie a keda aresta pa agencia anti-droga di Merca, DEA, na Miami. El a keda deteni hunto cu e cabesante di ports di BVI, Oleanvine Maynard, kende su yiu homber tambe a keda aresta en conexion cu e caso.
Nan a keda acusa di conspiracion pa traficacion di cocaina y labamento di placa despues di presenta via video link na un corte di Florida riba diabierna, segun fiscalnan Mericano a confirma. Nan ta bay keda den custodia te un audiencia di fianza mañan.
Sr. Fahie ta acusa di acorda un pago di $700mil pa permiti traficadornan usa wafnan di BVI cu un informante encubierto, segun e cargonan na Merca.
Dudanan tocante gobernacion na e teritorio ta bay back prome cu e arestonan, cu preocupacionnan tocante corupcion estatal y maluso di placa di pueblo, pero e noticia a agilisa e publicacion di un investigacion riba con por miho adresa e preocupacionnan aki.
E rapport, comisiona na 2021 y dirigi pa hues Britanico, Sir Gary Hickinbottom, a describi e estado di gobernacion na BVI como ‘abrumantemente malo’, pero no ta directamente conecta na e aresto di e premier.
A recomenda pa gobierno Britanico suspende e Constitucion di e teritorio y implementa gobernacion for di cas pa al menos dos aña, loke ta nifica cu efectivamente e islanan lo bolbe na gobernacion directo for di London.
Riba potret: Sr. Fahie.
