Diadomingo atardi den e prome wega pa 4or di atardi, e ekiponan di Dakota y Britannia a topa otro riba tereno di Franklyn Bareño den e di dos buelta di e campeonato di Damas Open.
A presencia e prome tempo unda nos a wak un wega cu Britannia a domina por completo pero sinembargo, e pumanan tabata slordig dilanti gol cu e oportunidadnan aunke nos mester duna credito na e keeper di Dakota cu a para masha hopi bala mes sin lubida e linea di defensa cu a traha super duro. Dakota ainda no tin un ekipo completo y falta algun hungador clave.
Di otro banda e lady pumanan di Britannia a hinca gol te na di 24 minuut ora cu e keeper di Dakota no por a tene un tiro di Loredana Neppi y aki Jorainne Wester den e rebote ta pusha e bala den gol pa e 1 – 0. Despues di e gol, Britannia a bira mas efectivo y aki Loredana cu un tiro di distancia ta haci e wega 2 – 0. Aki ta na unda e motor a cende y e pumanan a cuminsa anota varios gol uno tras di otro.
Na final Britannia ta gana Dakota 14 – 0 cu golnan anota pa Jorainne Wester cu dos gol, Loredana Neppi cu 5 gol, Ashley Douglas cu 1 gol, Dyvienne Henriquez cu dos gol, Krislaine Kelly cu 1 gol, Stacey Lampe cu 1 gol, Mylene Croes cu 1 gol y Chiki Werleman cu 1 gol.
Den e otro weganan hunga nos ta haya Estrella ta gana La Fama 8 – 0 y RCA ta gana River Plate 2 -0. Den e victoria di Estrella riba La Fama, e golnan anota a bini di Lady Agudelo, Dinicienne Maduro, Andrea Odor cu dos gol, Liandra Angela cu dos gol y Paula Croes cu dos gol . Pa loke ta RCA su dos golnan anota contra River Plate, esaki nan a bini Genisis Hazel y Niamh Tromp.
