‘Brinda prosperidad por medio di un desaroyo turistico sostenibel’

Ronella Tjin Asjoe-Croes (ATA):

Oficina di Turismo (ATA) e tene su di 5 edicion di nan ‘Business Mixer’. Esaki ta un evento anual, unda ta reconoce y reconecta cu socionan den e industria di turismo. A papia entre otro tocante proposito principal di ATA pa brinda prosperidad por medio di un desaroyo turistico sostenibel.

Alabes a comparti informacion – segun e comunicado ricibi di ATA – di e aña cu a pasa como tambe loke por spera pa aña 2018 padilanti.

E evento a tuma luga ameno den e centro di playa, na e sitio Flor di Oriente. E invitadonan a toast hunto cu gerencia y personal di ATA, pa celebra e cooperacion fructifero, ATA a bisa den un comunicado pa prensa.

Diferente miembronan di parlamento tabata presente, entre otro presidente di Comite di Turismo di parlamento, Setty Christiaans-Yarzagaray, minister di turismo Dangui Oduber, minister di educacion Rudy Lampe, como tambe Grace Koolman, secretario di conseho di minister. Ademas tawata presente CEO di AHATA, Jim Hepple, CEO di AAA James Fazio, director di Aruba Ports Authority Jossy Figaroa, diferente invitadonan, hunto cu su staf y miembronan di ekipo di ATA.

CEO di ATA, Ronella Tjin Asjoe-Croes a inicia su discurso gradiciendo un y tur presente pa e cooperacion duna durante e aña cu a pasa. El a sigui indicando cu e Business Mixer ta pa celebra exitonan, pero tambe un pa refleha riba retonan cu a y ta presenta nan mes.

El a laga sa cu aña 2017 a cera exitosamente, na unda entre otro e mercado principal pa Aruba, Merca, a mira e crecemento mas fuerte desde 2004 cu 11%.

E mercado di Latino America a mira un crecemento (ora exclui Venezuela), como tambe e mercado di Europa. Esaki a bay man den man cu un rendimiento fuerte den e sector hotelero; Aruba tawatin e indice mas halto di crecemento den Caribe den RevPAR. Tourism Receipts, registra pa Banco Central, a surpasa e meta stipula di un incremento di 1% y lo por ta cerando aña cu un crecemento di 5%. Ademas di e exitonan aki, industria di crucero pa Aruba tambe a mira un incremento significante durante e lunanan cu ta conoci pa ta mas abao den turismo crucero. Tur esaki tawata delinea cu e obhetivonan strategico di ATA pa 2017.

ATA, hunto cu otro socionan manera Banco Central di Aruba, AHATA, Aruba Airport Authority y Aruba Ports Authority a aplica un nivel di cautela ora di fiha metanan pa 2017, considerando e retonan cu e segundo mercado mas grandi pa Aruba su turismo, esta Venezuela lo trece cu esaki. Mientras cu Venezuela su bishitantenan pa Aruba a reduci, esaki no a impacta e ingreso y rendimento pa nos isla. A contrario di esaki, e obhetivonan a surpasa e expectativanan. E horcannan cu desafortunadamente a impacta otro destinacionnan den region Caribense, a conduci na mas negoshi, pero mester subraya cu prome cu esey ya Aruba tabata gosa di un desaroyo fuerte den 2017.

Durante su discurso, CEO di ATA a comparti cu e proposito principal di ATA ta pa ‘brinda prosperidad por medio di un desaroyo turistico sostenibel’.

ATA ta pone hopi esfuerso pa cu balansa e necesidadnan di e comunidad, e bishitantenan, e socionan y tur esaki dentro di e parametronan di un desaroyo sostenibel, unda ta balansa e aspectonan economico, social y di nos medio ambiente.

Pa sigura beneficionan a largo plaso pa e industria turistico di Aruba, ATA ta dirigi e demanda di e bishitante cu ta gasta y ta laga mas atras den nos economia, facilitando di otro banda un desaroyo debido di nos producto turistico, uno cu ta yuda aumenta e calidad, pero tambe e experiencia cu e turista ta ricibi durante su bishita na nos isla. CEO di ATA a pone hopi enfoke riba e aspecto aki indicando entre otro cu ‘esaki ta responsabilidad di un y tur, incluyendo sector publico y priva’, e comunicado ta finalisa.