Brigada di Bombero Boluntario di SN a recorda nan coleganan cu a muri den WTC

Ayera den cuadro di celebracion di Birgen di  Mercedes, patrona di e bomberonan, e Brigada di Bomberonan Boluntario di San Nicolas a rindi un tributo na e feliz memoria di e bomberonan cu a fayece den e actonan terorista di dia 11 di september na Merca 15 aña pasa.

E comandante di e brigada aki, Sr. Rolando Wilson a declara na Bon Dia Aruba cu despues cu e tragedia aki a sosode na aña 2001, tur aña nan na honra e memoria di e bomberonan aki cu a sacrifica nan propio bida pa salba e bida di otro hendenan.

El a relata cu algun di e bomberonan cu a muri den e edificionan di World Trade Center (WTC) dianan antes di e tragedia aki 15 di nan a bishita e sede principal di e brigada di e bombero boluntario na San Pedro di Macoris, Republica Dominicana. Sr. Wilson a bisa cu nan ta bin cu e reflexion aki pa e bomberonan sa cu nan funcion ta esun di salba bida y pa recorda nan rumannan y compañeronan bombero di Merca.

“Si mi tabata t’ey, sigur mi lo a bira un di e victimanan, ya cu semper na Santo Domingo den un candela mi tabata den prome linea di e candela”, el a bisa.

Sede nobo

E aña aki e celebracion di Dia di Patrona di e Bomberonan tabata uno special, ya cu pa prome biaha nan a celebra den nan sede nobo situa banda di e misa Anglicano na San Nicolas. Nan a tene un soft opening di nan sede cu un desayuno entre e miembronan di e bombero boluntario aki y nan famianan tambe. Sr. Wilson a gradici prome na Dios y despues na nan capeyan pader Jaco y e comision di Iglesia Anglicano cu a facilita pa e brigada aki por haci uzo di e cas aki como nan sede.

Sr. Wilson a laga sa cu durante 5 aña nan ta bin luchando pa haya un sede pa nan brigada. E aña aki si nan tin nan sede general cu lo wordo inaugura otro aña, ya cu nan mester realisa algun trabou di reparacion riba dje. Igualmente el a indica cu prome cu fin di aña nan lo realisa algun obranan social na beneficio di nos comunidad. Pa tal motibo e ta haci un peticion na nan miembronan pa nan ta mas activo.

Tambe el a convoca tur hende cu lo desea di forma parti di e brigada pa tuma contacto cu nan den nan sede banda di Iglesia Anglicano na San Nicolas. “Semper nos a lucha y semper nos lo sigui cu nos lucha den bienestar di pais Aruba”, el a bisa. Tur hende ta bonbini aunke e ta reconoce cu no ta facil pa haya miembro boluntario cu lo ta dispuesto di duna di nan tempo a cambio di nada.