Diadomingo ultimo e Brigada di Bombero boluntario di San Nicolas afilia na e cuerpo di bombero di Republica Dominicana a celebra nan Dia di Bombero.
Comandante Rolando Wilson a recorda cu e dia special aki anualmente ta wordo celebra e di dos diadomingo di luna di maart. Historicamente e fecha aki a keda institui pa medio di un publicacion oficial den e landscourant di Rep. Dominicana No. 76 di dia 17 di mei di 1954 bou e decreto gubernamental 9398.
For di e fecha ey tur aña ta wordo celebra e dia tan special aki pa e cuerpo Dominicano di bombero boluntario y na Aruba nan ta celebra esaki tambe. E dia aki nan ta honra e trabou nada facil cu e bombero ta realisa.
E tempo aya e bomberonan no tabatin material ni ekipo pa combati candela manera awendia. Sino cu ora un candela tabata sosode e bomberonan boluntario tabata crea un tipo di cadena humano y hemchi pa hemchi for di e sitio cu nan tabata haya awa, nan tabata combati e candela.
E aña aki e miembronan di e brigada aki a reuni na Cas Marie na Savaneta, unda nan a bendiciona e dia aki. Tambe algun di e miembronan a haya promocion di nan rango, mientras dos miembro nobo a keda huramenta. Comandante Wilson a papia riba historia di e dia aki y con e brigada aki a wordo lanta 5 aña pasa. Tambe el a papia di e sacrificio cu e bombero ta haci na Republica Dominicana y henter mundo pa salba hende.
Igualmente el a haci un yamada pa recluta mas miembro y asina reforsa e brigada aki cu ta realisa trabou boluntario den nos comunidad. Despues nan a tene un suculento lunch na cas di un miembro cu a traha un variedad di cuminda tipico Dominicano. Nan a pasa un dia masha alegre y placentero.
