Segun publicacion reciente di Oficina Central di Estadistica (CBS), e comparacion entre luna di october 2018 y october 2019 ta mustra riba un creciente diferencia entre loke ta e minimo mensual necesario pa un famia di cuatro persona (mama, tata, dos yiu) subsisti (‘bestaansminimum’) entre october 2018 y october 2019. Igualmente e diferencia entre salario minimo y e minimo di subsistencia di un persona pa e mesun periodo aki.

Pa loke ta e situacion di e famia ‘standard’ cu CBS ta maneha, esta esun di cuatro persona menciona, por observa cu un aña pasa e costo minimo tabata Afl. 4.644 pz luna. Na october di e aña aki e cifra aki a subi te na Afl.5.002. Un diferencia di Afl. 358,- pa luna, y di Afl. 4296,- pa aña.

Pa e otro categorianan contempla, tambe costo di bida a subi corespondientemente. Pa un adulto soltero costo di bida mensual minimo a subi di Afl. 2211 pa Afl. 2382. Famia di un adulto y un yiu a subi di Afl. 2875 te Afl. 3096. Pa mas detaye nos ta referi na e tabel no. 14 acompañante.

Pa loke ta e diferencia entre salario minimo y e minimo di subsistencia nos por mira cu, mientras e salario ta na nivel di Afl. 1762 pa 2019, e diferencia cu e minimo di subsistencia a crece te na Afl. 620 pa luna (Tabel no. 15). Esaki ta e diferencia mas grandi di ultimo añanan. For di e tabel acompañante aki por conclui tambe cu, mientras e bestaansminimum a crece cu Afl. 300,- desde 2015, salario minimo a aumenta solamente cu Afl.125.

E minimo di subsistencia ta ser calcula a base di tur e indicadornan di recurso esencial cu un adulto mester den un luna di aña. Ta trata aki di asunto manera cuminda, paña, gasto di vivienda, transporte y otro item mas di e ‘canasta’. Pa yega na calcula e costo total di un famia den diferente composicion, ta conta 0,5 di e costo pa e prome adulto (1,0) pa e di dos adulto den e hogar. Pa cada yiu di 0-14 aña ta conta acerca 0,3 di e costo di e prome adulto. Hoben di 15 aña of mas ta conta como adulto.

Nota: Desde aña 2010 ta calcula e minimo di subsistencia aki tumando como base e datonan di e rapport ‘Bestaansminimum 2010’ y ta adapta e cifranan cada luna segun e variacion di e ‘Consumer Price Index’ (CPI) di e luna ey.

E aumento fuerte di e CPI durante ultimo aña naturalmente ta producto di e aumento di BBO/BAVP di 2018 y den menor grado producto di otro factor manera prijs di combustible. E inflacion pa 2019 lo tin un promedio di 3,3% y segun Banco Central di Aruba, si no bin otro medida di parti di gobierno, esaki lo mengua te na 1,2% na 2020.

E pregunta cu ta keda ta, con y cuanto hogar ta keda afecta pa e desaroyo aki. Pa e soltero cu salario minimo por ta haci un diferencia si e ta comparti hogar cu famia of otro persona cu tin un entrada substancialmente mas halto, cu ta facilita un bida mas comodo. Ta obvio sin embargo cu mester di dos salario di Afl. 2.500 cada un pa yega na e minimo pa un famia, loke no tur famia tin.

Asina leu cu nos informacion ta alcansa, nos a comprende cu tin un conseho di Sociaal Economische Raad (SER) traha caba, manera ta e caso anualmente, cu lo ta basa riba e diferencia di CPI na augustus 2018 y augustus 2019, cu ta 3.8 (96.0 vs 99.8). E index general (CPI) ta recalcula recientemente, cu juni 2019 como base nobo di 100. Un aumento di 4% di e salario minimo lo por significa un minimo nobo na alrededor di Afl. 1830. Aunke di un banda por mira esaki como un alivio pa esnan cu salario minimo, mester considera kico ta e impacto di e medida riba economia na 2020, unda ya ta conoci cu no por conta cu un crecemento economico fuerte.