(Infobae) – Cifra di desempleo na Brazil ta ubica na 10.5% di e poblacion economicamente activo na luna di april, un reduccion di 4,3 punto porcentual compara cu e mesun periodo na aña 2021, pero te ainda cu 11,3 miyon desempleado, segun gobierno a informa ayera diamars.
For di decada pasa, e cifra di desempleo na Brazil ta wordo publica pa luna, pero ta tuma den consideracion e tres luna anterior di e periodo menciona.
Te april, e number di personanan cu tabata busca trabao tabata di 11,3 miyon, un cifra menor den un 25,3% compara cu 15,2 miyon desempleado na e prome tres luna di e mesun periodo di 2021.
Segun un rapport di coordinado di Trabao y Rindimento di IBGE, Adriana Beringuy, e reduccion di desempleo ta confirma un tendencia faborabel cu ta presenta for di segun semester di aña pasa y cu na april a registra un record den e nivel di ocupacion di e personanan.
Na april, e poblacion ocupa tabata suma 96,5 miyon trahado, loke ta ekivalente na 55,8% di e poblacion economicamente activo di e pais sur Americano y un aumento di 10,3% (9 miyon persona mas) den e mesun periodo di 2021.
E number di trahadonan formal na sector priva, sin inclui domestico, na april a alcansa 35,2 miyon persona, loke ta nifica un aumento di 2,0% compara cu e tres luna anterior y 11,6% (3,7 miyon persona) den comparacion anual.
E rindimento promedio di trahadonan Brasileño na april ta ubica cu 2.569 real pa luna (casi 513 dollar) cu ta representa stabilidad compara cu e tres luna anterior y un atraso di 7,9% compara cu e mesun periodo di 2021.
