Brazil: Presidente ta enfatisa di lo atende Asamblea General sin ta vacuna

Bolsonaro ta reta regla di New York y Asamblea General di Nacionnan Uni

Presidente di Brazil Jair Bolsonaro ta insisti cu e lo atende e Asamblea General di Nacionnan Uni otro siman na New York, a pesar di no a tuma e vacuna contra Covid-19. “Mi lo ta na e Asamblea General. Mi lo duna e discurso di apertura riba Diamars,” e Presidente a bisa den su transmision regular via rednan social.

Ciudad di New York a determina cu vacuna ta obligatorio pa tur persona cu ta drenta facilidadnan di Nacionnan Uni y esnan cu kier atende e Asamblea General. E decision aki a keda difundi pa e Departamento di Salud di Ciudad di New York dia 9 di September ultimo.

Mesora despues di e publicacion di e decision di e ciudad Mericano, Secretario General di Nacionnan Uni, Antoio Guterres a bisa cu e no por impone un rekisito asina riba hefenan di estado. Brazil cu su 213 miyon habitante, ta e di cuater pais na mundo cu a ricibi mas vacuna, segun data di Our World in Data. Pero e Presidente mes te cu awor a rechasa tur vacuna, y ta insisti cu e lo ta e ultimo Brazilero pa tuma e vacuna.

Jair Bolsonaro, kende a keda infecta cu COVID-19 aña pasa a argumenta cu e ta inmunisa caba.

Presidente nobo di e Asamblea General di Nacionnan Uni, Abdulla Shahid tambe a bisa e siman aki cu e lo pidi prueba di vacuna di esnan cu ta atendiendo e evento mas importante di Nacionnan Uni.

Otro cu ta opone e mandato di vacuna ta Embahador di Rusia na Nacionnan Uni, Vassily Nebenzia, kende a manda un carta pa Shahid pa expresa su sorpresa y desapunto. “Nos ta opone fuertemente cu unicamente esnan cu prueba di vacuna lo keda admiti na e Asamblea General,” Nebenzia a bisa, agregando cu e medida ta discriminatorio y den violacion di e statutonan di Nacionnan Uni. Di otro banda, segun e reglanan di e Asamblea General 2021, tur miembro di delegacionnan mester mustra nan certificado of prueba di vacuna prome cu nan come, bebe of haci ehercicio den e zona di Nacionnan Uni y pa por participa den cualkier actividad di entretenimento, gastronomia y ehercicio den ciudad di New York.