(Infobae) – Por lo menos ocho capital regional di Brazil, entre nan Salvador y Belo Horizonte, a cancela e fiestanan di fin di aña pa e miedo cu casonan di coronavirus lo aumenta despues cu recientemente a keda conoci e variante Omicron.
Brazil un di e paisnan cu a wordo afecta mas pa pandemia di Covid-19, awe ta bibando momentonan di cierto stabilidad den relacion cu e contagio y mortonan, cu ta den nivel mas abou desde cu crisis sanitario a cuminsa, na februari 2020.
Den memey di e tendencia baha aki, atribui na avance di vacunacion, autoridadnan regional y local Brasilero tabatin plania celebra conciertonan y actonan conmemorativo pa fin di aña, pero aumento di infeccion na Europa y e descubrimento di variante Omicron, detecta pa prome biaha na Sur Africa, a bati alarma na varios punto di e pais.
Den contexto aki, e prome capitalnan regional di e pais cu a cancela e fiestanan ta Salvador, Belo Horizonte, Fortaleza, Florianópolis, Joao Pessoa, Sao Luís, Campo Grande y Palmas. Ocho di un total di 27.
Den caso di Florianapolis, capital di estado di Santa Catarina, a manten’e espectaculo di klapchi, pero no lo tin actuacion musical cu e obhetivo di evita aglomeracion di hende.
Te awor, Sao Paulo ciudad mas grandi di e pais, y Rio de Janeiro, esun mas turistico na unda tradicionalmente miyones di persona ta reuni na su beachnan dia 31 di december, keto bay ta continua cu su plannan, aunke cada biaha tin mas voz den mundo di medicina, cu ta recomenda e cancelacion.
Brazil, cu ta acumula mas di 22 miyon di caso positivo y cerca di 615.000 morto pa Covid-19, ainda no a registra ni un caso di variante Omicron, aunke ta investiga un persona posiblemente afecta di e variante aki na estado di Sao Paulo y otro na Minas Gerais, cu su capital ta Belo Horizonte.
