(EFE) – Presidente Brasileño, Luiz Inacio Lula da Silva a biaha ayera diahuebs pa Washington den su prome cita cu e mandatario Mericano, Joe Biden, cu ken ta bay papia di un agenda cu ta inclui democracia, medio ambiente y paz.

Segun fuentenan oficial, esaki ta e prome bishita di Lula na Cas Blanco den su di tres mandato, cu a cuminsa 1 di januari y lo tin un contenido specificamente “politico,” aunke tambe tin algo comercial y otro temanan di medio ambiente y derechonan humano.

E delegacion ta integra pa e canciyer Mauro Vieira, e titularnan di Medio Ambiente, Marina Silva; di Hacienda, Fernando Haddad; Igualdad Racial, Anielle Franco, asina como tambe e vice-minister di Industria y Comercio, Marcio Elias Rosa.

E avion presidencial Brasileño a yega ayera den oranan di atardi na Base Aereo Saint Andrews, pero Lula su agenda ta bay cuminsa awe.

E prome acto ta bay ta un encuentro cu senador Bernie Sanders, di e sector mas iskierdista di e Partido Democrata. Despues ta bay reuni cu otro legisladonan di partido gobernante y cu un grupo di sindicalistanan, pa despues dirigi na Cas Blanco.

Un di e puntonan principal di e agenda di Lula cu Biden ta e “menasa” cu ultraderecha radical ta representa, cu a mustra su cara mas violento precisamente na Washington y Brasilia.

Dia 6 di januari di 2021, diescuater dia prome cu Biden lo a yega na poder, ultraderecha respalda pa Donald Trump y cu no tabata acepta e victoria di e democrata a drenta di manera violento na e Capitolio.

Dia 8 di januari ultimo tabata e siguidonan di e ex-mandatario Jair Bolsonaro a drenta di mesun forma violento na e tres poder di e Nacion na Brasilia, den un intento di provoca un golpi di Estado contra Lula, ken a asumi e poder 1 di januari.

Di otro banda, Lula a priminti combati e crisis climatico, bandona durante gestion di Bolsonaro, cu enfasis special den e reduccion di deforestacion di Amazonia, cu ta e fuente di emision contaminante mas grandi di Brasil.

Sinembargo, a afirma cu e esfuerso ey tin mester di mercadonan di credito di carbono acorda den Protocol di Kioto, cu ta na vigor for di 2005 y pa esey bira un realidad.