Solamente algun dia despues di e masacre den un prison na Manaus, otro matansa grandi a tuma lugar den sistema penitenciario di Brasil. E biaha aki ta e prison Agricola di Monte Cristo, Roraima, den norte di e pais. Te awor e informacion ricibi ta papia di 30 morto, den un conflicto cu a cuminsa den marduga di diabierna, entre grupo perteneciente na diferente banda di narcotrafico. Prensa local a informa di varios curpa decapita o desmembra, pero esaki no a keda confirma pa autoridad. Relatonan inicial ta duna cuenta di cu e mortonan lo ta pa mayoria liga na e grupo delincuente ‘Comando Vermelho’ y nan aliadonan di ‘Família do Norte’, y cu a ser asesina pa preso di ‘Primeiro Comando da Capital’ (PCC), como vengansa pa loke a sucede na Manaus.
“E situacion ta bao control y e Batayon di Operacion Special (BOPE) di Polis Militar ta na e halanan di e referido prison”, e texto di e nota di secretaria di husticia di estado ta bisa. E prison Agricola di Monte Cristo, cu ta conta cu cerca di 1.200 detenido, un poco mas cu doble di su capacidad, tabata escenario di otro episodio di violencia similar na october di 2016. E tempo ey preso di Primeiro Comando da Capital a asalta otro preso di Comando Vermelho y a mata 10 di nan. E matansa aki a ser considera un ruptura entre e dos bandanan menciona, cu pa decada tabata aliado.
Mientras tanto, presidente Michel Temer a anuncia gobierno federal lo destina cerca di 250 miyon real (US$ 1 = ± 3 Real) na construccion di cinco prison nobo federal. Cada prison nobo lo haya como 250 cupo di seguridad maximo pa cera por ehemplo lidernan di banda criminal. Tambe 150 miyon real lo bay na cumpra ekipo pa blokea señal di celular pa por lo menos 30% di su prisonnan. Di noticia anterior a tuma nota cu actualmente solamente un tercera parti di prison na e pais ta dispone di e aparatonan aki.
