(EFE) – Ex-presidente Brasilero, Luiz Inacio Lula da Silva ta mantene como faborito pa eleccionnan di october proximo, cu un 42.2% di intencion di voto, compara cu 28% cu e gobernante actual, Jair Bolsonaro, por haya segun un encuesta divulga ayera dialuna.
E encuesta a ser solicita pa Confederacion Nacional di Transporte (CNT) pa e firma MDA y ta coincidi cu tur encuestanan publica den ultimo lunanan, cu ta atribui na Lula e apoyo di mas di 40% di votadonan y ta ubica Bolsonaro cu menos di 30%.
Den un scenario cu un concentracion halto entre e lidernan progresista y ultra derecha, e encuesta di MDA ta mustra di tres y cuater luga e preferencia di Ciro Gomes cu 6.7% y ex-hues Sergio Moro cu 6.4%, continuando cu cinco candidato cu te ainda no ta supera 2% di intencion di voto.
Tambe a identifica un number abao di votadonan indeciso (6%) y un porcentahe similar cu ta propone pa vota nulo.
Segun MDA, e posibel competidonan di Lula ta suma 45.3% di apoyo, compara cu 42.2% di e lider progresista, loke por hiba e situacion na un segunda buelta, cual ta necesario si un candidato no supera 50% di e total di voto haya pa tur su contrincante.
Den caso di e segunda buelta, Lula lo por derota cualkier otro candidato y si e candidato ta Bolsonaro, lo gana cu un 53.2% compara cu un 35.3% cu e gobernante actual por haya.
MDA tambe a midi e imagen di e Gobierno ultra derechista, na unda 25.9% a considera su gestion ‘positivo’, 30.4% a hay’e ‘regular’ y 42.7% ‘negativo’.
Esaki tambe ta refleha e nivelnan di rechaso cu e dos principal candidato tin, den caso di Bolsonaro ta mas di 55.4% y si ta trata di Lula, ta ubica cu 40.5%.
Segun MDA, e encuesta tin un margen di eror di 2.2 punto porcentual, un nivel di confiansa di 95.6% y a ser realisa di manera presencial entre 16 y 19 di februari ultimo, un periodo den cual 2.002 votado di tur region di e pais a ser entrevista.
