(Infobae) – Presidente Brasileño Jair Bolsonaro, ayera diaranson a substitui e minister di Mina y Energia, Bento Albuquerque, poco dianan despues cu a cuestion’e publicamente pa permiti cu e compania petrolero estatal Petrobras a anuncia un aumento nobo den e prijsnan di diesel.
Di acuerdo cu un decreto publica ayera na Diario Oficial y cu no a wordo anuncia prome, e lider ultra derechista a substitui Albuquerque, un almirante di Marina y cu tabata un di su principal homber di confiansa, pa e economista Adolfo Sachsida.
Aunke e decreto a afirma cu e cambio a wordo haci pa peticion di e minister mes, esaki a tuma luga seis dia despues cu e hefe di Estado a tira palabranan y criticanan na su minister y na e presidente di Petrobras, Jose Mauro Coelho, pa ahustenan continuo den e prijsnan di combustibel.
Petrobras, tin un politica di ekivalencia di prijsnan cu e cual ta revisa den mercado Brasileño e cotisacion internacional di crudo unda cu e siman aki a anuncia un aumento nobo di diesel, e combustibel principal cu ta wordo usa pa trucknan na Brazil, den un ahuste cu por pone mas presion pa e inflacion creciente, faltando algun lunanan pa eleccionnan presidencial.
Den un transmision en bibo, Bolsonaro cu gritonan a califica e ganashinan di Petrobras como un “violacion” cu solamente ta beneficia inversionistanan stranhero.
Aunke ta un compania estatal, Petrobras tin accionnan negocia den bolsa di balor di Sao Paulo, New York y Madrid, hunto cu reglanan cu ta impedi un intervencion directo di Estado.
