(Mercopress)—Minister di Economia di Brazil, Paulo Guedes ayera a ilustra e plan di privatisacion cu ta inclui e empresa gigante, Petrobras. E plan di privatisacion ta encera un proceso cu ta bay afecta como 100 compania, y e argumento di e Minister ta cu e futuro “ta berde y den algun aña e balor di crudo lo ta cero.”

Segun Guedes, Petrobras no ta na agrado di ningun hende mas y ta mas bien un bom riba holoshi pa Gobierno. El a bisa esaki durante un reunion virtual cu otro autoridadnan unda el a reafirma cu mundo ta bayendo pa un economia berde y digital. E Minister ademas a menciona e scandal cu Petrobras, unda a constata corupcion na gran escala.

E posibel privatisacion di e gigante di azeta y gas, Petrobras, cu ta bou control di Gobierno di Brazil, pero cu participacion priva, cu accionnan riba e bolsanan di mercado na Sao Paulo, New York y Madrid ta un pensamento di e Gobierno di Jair Bolsonaro cu a bira conoci e ultimo lunanan aki. Segun e declaracion di Presidente Bolsonaro, e idea a nace for di e aumento drastico di prijs di petroleo, cu a yega na 50 porciento e aña aki. E aumento di e gasto di petroleo, y su productonan ta entre e temanan cu ta afecta e popularidad di Bolsonaro kende na October 2022 lo mester bolbe gana confiansa di Brazileronan, den su intento pa keda reeligi durante e eleccionnan Presidencial di e pais.

Bolsonaro a keha luna pasa cu Petrobras ta dun’e unicamente dolor di cabes y a bisa di tin duele cu e no por interveni den e maneho di prijs di combustible y e aumento continuo di costo general pa economia. “Kico ta asina bon pa Petrobras logra record di produccion, si e beneficionan ta bay unicamente den cartera di e accionistanan y no e sociedad y consumidornan,” Bolsonaro a lamenta.

Guedes, den su declaracion ayera a pronostica cu esnan cu ta opone e privatisacion di Petrobras lo keda sinta riba barinan di petroleo cu denter di algun aña lo no tin ningun balor, ya cu mundo ta bayendo den direccion di energia sostenibel.

E economista, considera ortodox, tambe kier privatisa tur compania estatal di Brazil y a bisa cu esnan cu ta contra e maneho ey y cu kier mantene Petrobras den man publico, unicamente ta “interesa den horta atrobe,” referiendo na e caso di corupcion grandi den Petrobras unda biyones di dollar a desaparece. E caso di corupcion aki a sosode durante e gobiernonan di e Partido Laboral bou liderazgo di ex Presidente Lula da Silva, kende un biaha mas ta considera e oponente principal di Bolsonaro durante e siguiente eleccionnan presidencial na e pais Sur Americano.