Proposicion di Presidente di Brazil pa usa papel pa vota no a haya e mayoria rekeri pa Constitucion
Miembronan di e prome Camara di Congreso di Brazil a rechasa e plan di e Presidente ultra -derechista di e pais, Jair Bolsonaro pa cambia e sistema di vota. E voto a tuma luga mientras cu e Presidente a monta henter un demostracion militar, algo cu a causa hopi disgusto memey di e legisladornan.
Politiconan di tur skina, derechista y iskierdista a bisa cu e parada di tanki, vehiculonan grandi arma y otronan amfibico como un forma di intimidacion. Forsanan militar a dicidi pa organisa e parada net prome cu e legisladornan a vota pa mira si ta acepta of no, e amienda Constitucional cu Bolsonaro tabata kier.
E votonan tabata 229 na fabor y 218 en contra, cu 1 abstencion. Varios legislador no tabata presente. Pero pa a cambia e Constitucion y introduci e amienda, tabatin mester di un mayoria di tres quinto (3/5) pa aproba. Tabata falta 79 voto.
Forsa Naval di Brazil a bisa cu a planea e parada hopi prome cu e voto den Congreso a keda programa y e intencion tabata pa invita e Presidente na un ehercicio militar anual riba Diadomingo. Bolsonaro mes no a comenta riba e parada.
Pero, Bolsonaro ta confrontando reto politico den sentido cu su popularidad a cay hopi, particularmente pa motibo cu Brazil tin e di dos caso di contagio di COVID-19 di mas grandi di mundo. Bolsonaro den ultimo simannan a cuminza papia di potencial problema di confiabilidad di e sistema electoral na Brazil y a insisti cu mester introduci votacion pa medio di formularionan di papel pa 2022. E Presidente no tabatin prueba pa mustra cu tabatin fraude den e sistema di voto electronico. Bolsonaro a menasa cu e lo no acepta e resultadonan di eleccion Presidencial na 2022, cu segun encuestanan lo nifica cu e lo perde di ex Presidente, Luiz Inacio Lula da Silva. Ni Bolsonaro ni Lula anuncia nan candidatura oficialmente.
Jair Bolsonaro tabata rondona pa comandantenan di forsanan arma, pafo di su palacio Presidencial pa observa e parada militar. Pa hopi Brazilero cu a biba bao di e dictadura militar entre 1964 pa 1985 a expresa di a sinti preocupacion pa locual a mira.
Legislador Arthur Lira, Portavoz di e prome Camara di Congreso a bisa cu e parada militar, net prome cu e voto crucial tabata un coincidencia tragico y no a acepta e invitacion pa atende e ehercicio militar. Otro politiconan a expresa cu e presencia inusual di militarnan dilanti e Palacio Presidencial tabata nada otro cu un intimidacion. Entre e politiconan aki tabata Senador Simone Tebet di e Movecion Democratico di Brazil, un partido centrista.
Politicologo Mauricio Santoro di Universidad di Estado di Rio de Janeiro a bisa agencia di noticia AFP cu Bolsonaro a usa e parada di tanki pa intimida tanto Congreso como Corte Supremo.
