Brazil: Bolsonaro ta yama ‘Omicron’ bonbini; WHO no ta contento

(Mercopress)—Presidente di Brazil Jair Bolsonaro e siman aki a bisa cu e variante Omicron di e virus SARS-CoV-2 cu ta duna COVID-19, ta ‘bonbini’ na e pais, ya cu hopi ta bisa cu e lo por ta e fin di e pandemia.

“Hendenan serio y studia, cu no ta mara na companianan farmaceutico ta bisa cu Omicron ta bonbini y es mas, por nifica e fin di e pandemia,” segun Bolsonaro durante un entrevista cu e website Gazeta Brasil. El a agrega cu e variante Omicron, cu ta causando un incremento grandi den casonan di COVID-19 rond mundo, por ta un virus cu ta produci pa e vacuna.

E Presidente a resalta rond mundo pa su actitud desafiante den luz di e pandemia. Na varios ocasion, Bolsonaro a cataloga COVID-19 como un ‘griep chikito,’ a pesar cu mas di 600 mil di su paisanonan a muri pa motibo di e virus. Tambe el a declara cu e lo no laga su yiu di 11 haya e vacuna contra COVID-19.

Omicron a conduci na un aumento skerpi den casonan di COVID-19 na Brazil, cu mas di 70 mil infeccion registra pa dia. Esaki contrario na December, unda casonan diario no tabata yega mas cu 10 mil. Pero aunke cu e cantidad di personanan contagia den hospital a aumenta, no tin e mesun aumento den cuido intensivo manera tabata e caso na 2021, particularmente prome cu e vacunanan.

A pesar di, locual te awor ta mustra, e sintomanan mas leve di e variante, expertonan medico ta adverti cu e contagio por pone demasiado peso riba hospitalnan y sistemanan di salud pa motibo di e rapidez di e transmision. Omicron a bira e variante dominante na varios pais, incluso Brazil.

“Kizas nos a yega na inmunisacion di grupo y ami no a vacuna,” Bolsonaro a bisa. “Tin hende cu a muri di otro malesa y ta bisa cu nan a muri di COVID-19,” e Presidente a bisa durante su entrevista.

Su declaracionnan a cay hopi malo cerca Organizacion Mundial di Salud, WHO. Ehecutivo di WHO Michael Ryan a reacciona bisando cu ningun virus cu ta mata hende por ta bonbini, particularmente si morto y sufrimento por keda evita. “Esaki no ta momento pa duna por venci, y declara cu e virus ta algo bon. Tin demasiado hende den cuido intensivo, mara na ventilador kendenan lo nenga cu esaki ta un malesa suave,” el a agrega.