(Reuters) – Dialuna ultimo, presidente di Brazil, Jair Bolsonaro a invita e cuerpo diplomatico pa scucha su acusacionnan cu sistema electoral di Brazil ta exponi na fraude, mirando cu eleccionnan di october ta cerca, na momentonan cu e ta bayendo atras den puntonan pa haya su di dos mandato.
“E sistema ta completamente vulnerabel”, Bolsonaro a bisa na 40 diplomatico cu a ser invita na su cas den un reunion informativo, tres luna prome cu eleccionnan general.
Bolsonaro no a entrega pruebanan cu un fraude por tuma luga, pero a menciona e entrada di un hacker den e sistema di votacion electronico durante eleccionnan cu el a gana na 2018, un hecho cu segun polis no a compromete di manera algun e resultado di votacion.
Bolsonaro a bisa na diplomaticonan cu mester yama Ehercito Brasileño pa yuda garantisa e transparencia di eleccionnan di dia 2 di october. E lider di derecha extremo a presiona autoridadnan electoral pa acepta un conteo di votonan cu lo ta den man di Forsanan Arma.
E diplomaticonan cu a asisti na e reunion a inclui esun manda pa Merca, Union Europeo, Francia, Spaña y Portugal, parti di e 50 embahador invita di 127 nacion cu tin mision na Brasilia. E pais bisiña Argentina, cu su presidente ta iskierdista, no a ser invita.
Funcionarionan Mericano a bisa cu Brasileronan mester confia den nan institucionnan democratico. Aña pasa director di CIA, William Burns a bisa na alto funcionarionan Brasileño cu Bolsonaro mester stop di pone den duda e sistema di votacion di su pais.
E titular di e maximo autoridad electoral di Brazil, Tribunal Superior Electoral, Edson Fachin, a ser invita na e sesion informativo aki hunto cu e diplomaticonan, pero a nenga, bisando cu e no por reuni cu un candidato electoral.
Bolsonaro a cuestiona varios biaha e sistema di votacion electronico na Brazil, argumentando –sin prueba – cu ta suceptible pa fraude, loke a genera temor cu lo nenga di reconoce un derota, manera Trump a haci na eleccionnan Mericano di aña 2020.
