![BRAZIL-BUS-TRANSPORT-ACCIDENT](https://www.bondia.com/wp-content/uploads/2024/07/Brazil-Accidente-di-un-autobus-turistico-a-laga-por-lo-menos-10-morto-y-42-herido-696x466.jpg)
(NTN24) – Ayera autoridadnan na Brazil a informa cu por lo menos dies persona a muri y otro 42 a resulta herido debi na un accidente di transito cu a tuma luga na estado di Sao Paulo.
Di acuerdo cu loke autoridadnan adteya, e accidente a sucede den oranan di marduga ora e autobus turistico den cual e victimanan tabata biaha a box contra un brug den oranan di marduga na region di Itapetininga.
E bus di dos piso cu “tabata core den e highway ora a box contra un di e pilarnan di e brug. A registra 52 victima, di e cual 10 a muri na e luga,” Secretaria di Seguridad Publico (SSP) di estado di Sao Paulo a señala.
Hospital Doutor Léo Orsi Bernardes, di ciudad di Itapetininga, a atende mas di 40 herido, dies di e cual tabata permanece den e centro di salud tur cu condicion “stabiel”, e institucion a informa a traves di un comunicado.
Segun e rapport di e accidente haci pa agencia regulado di transporte di estado di Sao Paulo, e chauffeur cu a sobrevivi, a conta cu tabata coriendo cu normalidad ora “pa causanan cu te ainda no ta conoci,” a produci un fayo mecanico cu a blok e direccion di e bus.
Ademas, den su relato e homber tambe a sigura cu a perde e control di e bus y eynan a box cu un pilar di e brug.
“Polis Militar di Careteranan a marca e luga pa realisa examennan forensico,” Secretaria a agrega.
Pasaheronan tabata turista y nan mester a bay na municipio unda ta ubica e Misa di ‘Nos Señora Aparecida’ patrona di Brazil, un luga importante pa turismo religioso na e pais sur Americano.
Di su parti, gobernador di Sao Paulo, Tarcicio Gomes de Freitas, a lamenta e noticia a traves di su rednan social sigurando cu: “ Nos ta pidi pa heridonan lo mehora cuanto antes.”
Autoridadnan tambe a revela cu ekiponan di emergencia ta trahando na e luga di e suceso pa por determina e causanan exacto di e fayo mecanico cu a ocasiona e accidente tragico aki.